Түүлээх нэһилиэгэр сүөһү, сылгы ииттэн олорор тоҕус оҕолоох Зоя Степановна уонна Иннокентий Михайлович Кузьминнар дьиэ кэргэттэригэр ыалдьыттаатым. Сэттэ оҕону көччөх гынан көтүппүт кэргэнниилэр оскуолаҕа үөрэнэр үс оҕолорун кытта, биир кырачаан сиэннэрин күн-ый оҥостон олороллор эбит. Тоҕус оҕо үөрэхтэригэр үчүгэйдэрин, ордук спортка, иискэ-ууска ситиһиилээхтэрин биир эркиҥҥэ толору ыйаммыт мэтээллэр, мэҥэ суруктаах халыҥ паапкалар туоһулууллар.
Улахан кыыс Ольга Дьокуускайдааҕы 3-с №-дээх поликлиникаҕа медсиэстэрэнэн, иккис кыыс Айыына Түүлээх орто оскуолатыгар иитэр үлэҕэ дириэктэри солбуйааччынан (кэргэнинээн көһөн кэлэн, оскуолаҕа үлэлииллэр, икки оҕолоохтор), үһүс оҕо Михаил тимир суол үөрэҕин бүтэрэн, билигин нефтебазаҕа үлэлиир (кэргэннээх, үс оҕолоох). Төрдүс оҕо Матрена АГАТУ-га «Лесное дело» салаатын быйыл бүтэрэр, бэһис уол Рустам Дьокуускайдааҕы уу транспорын үөрэҕэр 3-с кууруска үөрэнэр. Оттон алтыс уол Артем Дьокуускайдааҕы летнай училищеҕа бортмеханик идэтигэр үөрэнэр. Оттон Степан эһиил оскуоланы бүтэрэн, Хабаровскайга полиция идэтигэр туттарсар баҕалаах. Милена 9-с, Айсар 6-с кылааска үөрэнэллэр. Онон быйыл икки оҕо экзаменнаах. Ийэлэрэ Зоя Степановна – сынньалаҥ киинигэр техүлэһит. Тырахтарыыс идэлээх аҕалара Иннокентий Михайлович былырыын бэйэтэ бизнес-былаан оҥорон, социальнай контрагынан 500 тыһыынча солк. көмө ылан, сир оҥоруутунан дьарыктанан саҕалаабыт. Нэһилиэк ходуһалара талаҕынан үүнэн, дуулҕанан бүрүллэн, үгүс киһи маннык өҥөҕө наадыйарын этэллэр.
Элбэх оҕолоох ийэ маннык этэр:
– Бэйэм алта оҕолоох ыалга төрөөбүт буоламмын, куруук улахан дьиэ кэргэни оҥорон көрөрүм. Мин төрүт Түүлээх олохтооҕобун. Кэргэним урут суол оҥоруутугар үлэлии кэлэ сырыттаҕына, онно билсэн, ыал буолан олорбуппут 35 сыл буолла. Бу дойдуну кэргэним тута олус сөбүлээбитэ. Оҕолорбутун куруук үлэҕэ сыһыаран, үөрэхтэригэр, дьоҕурдарыгар болҕомтобутун ууран тапталынан иитэбит. Элбэх оҕону аһатан-сиэтэн, таҥыннаран олорор уустук, ол эрээри үлэлээтэххэ-хамсаатахха барыта кыаллар. Кэлиҥҥи сыллартан судаарыстыба, өрөспүүбүлүкэ өттүттэн оҕолоох ыалы үчүгэйдик өйүүр буоллулар. Аныгы үйэҕэ олохпут сайдан киһи ирдэбилэ улаатан иһэр, сыана үрдүү турар, онон маннык көмө баара сөптөөх дии саныыбын. Оттон оҕо этэҥҥэ сырыттаҕына, үчүгэй үлэлээх-хамнастаах буоллаҕына, аналын көрсөн, ыал буолан, оҕо төрөтөн, алаһа дьиэ тэриннэҕинэ, онтон ордук дьол суох!
Ити курдук саха сэмэй ыала оҕолорун үөрэхтээх дьон оҥортоон, билигин 14 сүөһүнү, 20-чэ сылгыны көрөн-истэн, оҕолорун ситиһиилэринэн дьоллонон, номнуо биэс сиэн минньигэс сытын билэн, төрөөбүт дойдуларыгар бултаан-алтаан, сир астаан олороллоро көрүөххэ, саныахха кэрэтин.
Мария АРГУНОВА