Атырдьах 20 күнүгэр улуустааҕы социальнай кэлим киин стационарнай отделениетын иитиллээччилэрэ уонна бу отделение базатыгар үлэлиир «Кустук» сайыҥҥы оҕо былаһааккатын иитиллээччилэрэ «Мүрү саһарҕата» хаһыат редакциятыгар ыалдьыттаатылар.
Оҕолору суруналыыс Светлана Сивцева үөрэ-көтө көрүстэ, тэрилтэ үлэтин туһунан билиһиннэрдэ, хаһыат суолтатын, корреспонденнар диэн кимнээхтэрин, хайдах үлэлииллэрин уонна улуус хаһыатын сайдыытын көрдөрөр быыстапка туһунан сырдатта, кабинеттары кэритэн көрдөрдө. Хаһыат урукку ааттарын, бэчээттиир массыыҥканы (машинка) дьиктиргээбит харахтардаах уолаттар уонна кыргыттар хас кабинет аайы сэрэнэн үктэнэн киирэн истилэр.
Бу тэрилтэҕэ үлэтин саҥардыы саҕалаан эрэр корреспондент Анатолий Кириллин профессиональнай фотоаппаратынан хаартыскаҕа түһэрэн компьютерга киллэрэрин, клавиатураны баттыалаан ыстатыйаны хайдах суруйарын быһаарарын, шеф-редактор Диана Седалищева хаһыат макетын кумааҕыттан пленкаҕа хайдах түһэрэри кэпсээбитин чуумпуран иһиттилэр.
Онтон хаһыат ситэн-хотон ааҕааччыларга көтөн тиийэргэ кынаттанан тахсарын хааччыйар саамай тыастаах-уустаах кэҥэс хоско тиийэллэр. Манна хаһыаты бэчээттээн таһаарааччы (печатник) Николай Неустроев станоктары быһаара-быһаара холбоон бэлэм хаһыат тахсан кэлэрин көрдөрбүтүгэр төгүрүспүт харах элбээтэ. Ол аата сөхтөхтөрө, соһуйдахтара…
Онон оҕолор хаһыат хайдах айыллан, таҥыллан, тахсарын сэҥээрэн иһиттилэр, оҥоһуллан тахсарын дьиктиргээн көрдүлэр, хаһыат диэн элбэх үлэттэн баар буоларын бэйэлэрин уу харахтарынан көрөн итэҕэйдилэр.
Түмүккэ Светлана Прокопьевна оҕолорго хаһыат пленкатын уонна хас биирдиилэригэр хаһыат бэлэхтээтэ, итиэннэ «Мүрү саһарҕата» хаһыаты сурутан ааҕалларыгар, хаһыат сайтын көрө сылдьалларыгар, олохторугар туһаналларыгар сүбэлээбитин үөрүүнэн ылыннылар, туһалаах көрсүһүү иһин махтаннылар. Чахчы даҕаны, сүүстэ истибиттээҕэр биирдэ көрбүт ордугун бу түгэн оҕолор хайдах ылыммыттарынан көрдөрдө. Сахалыы тыллаах соҕотох хаһыаппытын ааҕар оҕо элбиэхтин!
Светлана Бурцева, уопсас. кэрэсп.