СӨ культуратын үтүөлээх үлэһитэ, СӨ норуодунай бэйиэтэ Иван Васильевич Мигалкин төрөөбүтэ 70 сылыгар аналлаах үс күннээх тэрээһин түмүктэннэ.
Мүрү, II Лөгөй уонна I Хоро нэһилиэктэригэр киэҥ ис хоһоонноох тэрээһиннэр түмүктэринэн резолюция ылылынна.
- Дьокуускай куорат дьаһалтатыгар ини-бии Александр Васильевич уонна Иван Васильевич Мигалкиннар ааттарынан уулуссаны ааттыыры туруорсуу, олорбут дьиэтигэр мемориальнай дуосканы ыйыыры ситиһии этиилэрэ киирдилэр.
- СӨ култууратын уонна духуобунай сайдыытын министерствотыгар Иван Мигалкин аатынан бириэмийэни, Бүлүү педучилищетын бастыҥ выпускнигын Иван Мигалкин аатынан анал стипендияны олохтууругар улуус дьаһалтата туруорсарыгар этии киирдэ.
- Улуус үөрэҕин управлениетыгар: оскуола оҕолоругар өрөспүүбүлүкэ таһымнаах күрэҕи ыытыы, Чараҥ оскуолатын уонна В.А. Протодьяконов – Кулантай аатынан литературнай түмэл базатыгар И.В. Мигалкин олоҕун, айар үлэтин чинчийэр оҕо сайыҥҥы лабораториятын лааҕырын тэрийии.
- Улуус культуратын управлениетыгар: икки сылга биирдэ ыытыллар «Куорсун» олохтоох автордар литературнай күрэхтэригэр И.В. Мигалкин аатын иҥэрэргэ; В.А. Протодьяконов – Кулантай аатынан түмэл дьиэтин-уотун саҥардарга.
- Улуустааҕы кииннэммит библиотека тиһигэр: икки сылга биирдэ бэс ыйыгар И.В. Мигалкиҥҥа аналлаах өрөспүүбүлүкэ таһымнаах «Уйбаан Мигалкин самаан сайына» литературнай тэрээһини ыытарга; ырыа буолбут хоһооннорун кинигэтин таһаарыы;
- Мүрү нэһилиэгин дьаһалтатыгар: И.В. Мигалкин аатын үйэтитэр бюст эбэтэр стендэ бырайыагын оҥорорго, уулуссаны ааттыырга; олорбут дьиэтигэр, Ленин аатынан 19 аадырыска, мемориальнай дуосканы 2025 сылга туруоруу.
- I Хоро нэһилиэгин дьаһалтатыгар: Чараҥ бөһүөлэгин уулуссатыгар И.В. Мигалкин аатын иҥэрэргэ.
8. II Лөгөй нэһилиэгин дьаһалтатыгар: И.Е.Мигалкин скверыгар Иван Мигалкин бюһун туруоруу; И.В. Мигалкин аатынан научнай-практическай конференцияны ыытыы. - В.А. Протодьяконов – Кулантай аатынан түмэлгэ: И.В. Мигалкиҥҥа анаан экспозицияны тэрийии.
Түмүк тэрээһиҥҥэ улуус баһылыга Василий Аммосов махтал суруктары туттарда, ыытыллыбыт куонкурустар, викториналар түмүктэринэн кыайыылаахтар наҕараадаланнылар. Иван Мигалкин айымньыларынан дьүһүйүүлэр ааҕыллан, ыллам ырыалар ылланан истиҥ киэһэ буолла.
Иван Мигалкин быраата Афанасий Васильевич харда тылыгар олус долгутуулаах күннэр буолбуттарын этэн туран: “Убайым айымньылара киэҥник сырдатыллан, оҕо-аймах хоһоон, уруһуй куонкурсугар кыттыбытыттан, киин бибилэтиэкэ үлэһиттэрэ айымньыларын, кини туһунан ыстатыйалары түмэн библиография таһаарбыттарыгар, бары улуус олохтоохторугар улахан махтал. Ытыктыыр киһибит Сахабыт сирин бастакы президенэ Михаил Николаев “Улаханнык ытыктыыр дьоммут Иван Васильевич уонна кэргэнэ Зоя Васильевна норуот өй-санаа өттүнэн сайдыытыгар уһулуччу оруолгутугар сүгүрүйэбин” диэн олус сөптөөхтүк эппитэ”, – диэн түмүктээтэ, бар дьонугар махтанна.
Ытык киһибит сырдык аатын үйэтитэн “Айар” кинигэ кыһатын салайааччыта Август Егоров 2025 сылга Иван Васильевич туһунан ахтыы кинигэтин, “Саха народнай суруйааччылара” серияҕа бэйиэт талыллыбыт айымньыларын хомуурунньугун таһаарар былаанын иһитиннэрдэ. Итиэннэ сүдү киһибит аатын үйэтитэр бастакы тэрээһин олус истиҥник, киэҥ далааһыннаахтык ыытыллыбытыгар махтанна, сөхпүтүн эттэ.
Ольга Шепелева