Бүгүн улууспут нэһилиэктэрин баһылыктарыгар уочараттаах планеркалара буолла. Мунньаҕы улуус баһылыгын бастакы солбуйааччы Семен Бурнашев иилээн-саҕалаан ыытта.
Улуус дьаһалтатын хапытаалынай тутууга уонна архитектураҕа управлениетын салайааччыта Максим Гуляев 2026-2027 оттук сезонугар бэлэмнэнии туһунан кэпсээтэ. Кини улууспут үрдүнэн ититиини биэрэр 11 тэрилтэ үлэлииллэрин эттэ. Билиҥҥи туругунан, сүрүн кыһалҕанан бу 11 тэрилтэҕэ быйылгы оттук сезонугар АКК субсидията төлөммөккө турара буолар. Ол курдук улуус үрдүнэн 103 мөл. 490 тыһ. солк. суума төлөммөккө турара ДьУоКХ уонна чааһынай хочуолунайдары үлэлэтэр тэрилтэлэр оттук сезонугар бэлэмнэрин бытаардар. Итиэннэ биирдиилээн нэһилиэк төһө субсидияны ылыахтааҕын, кэлэр оттукка чоҕун таһыыта хайдаҕын, ханна туох өрөмүөн ыытыллыахтааҕын иһитиннэрдэ. Баһылыктарга чааһынай тэрилтэ диэбэккэ, туох өрөмүөн ыытылларын ирдииллэригэр сүбэлээтэ.
Холобур, Найахы нэһилиэгэр үлэлиир «Намкоммунтеплоэнерго» 35 мөл. 922 тыһ. солк. субсидияны ылардаах. Бу тэрилтэ 5 517 туонна чоххо наадыйар эбит буоллаҕына, билигин чоҕун барытын таһан олорор. Хочуолунайыгар былаан быһыытынан фитиннары, сир аннынааҕы отсектары, трассаны уонна хочуолунай дьиэтин, оһохторун өрөмүөннүүр сорук турар. Хочуолунайдар үгүстэрэ да ити курдук өрөмүөҥҥэ наадыйаллар.
Итини таһынан мунньахха билигин хас да хочуолунай чоҕун таһа илигэ ыйылынна. Итиэннэ ититии ситимин сайҕааһын боппуруоһа турда.
Салгыы тыа баһаарын боппуруоһугар иһитиннэриини Уус Алданнааҕы лесхоз салайааччыта Дмитрий Максимов оҥордо. Кини өрөспүүбүлүкэҕэ баһаар кутталын сезона ыам ыйын 8 күнүттэн саҕаламмытын, Уус Алдаҥҥа 13 тыа баһаара регистарацияламмытын, билигин тыа баһаара суоҕун туһунан эттэ. Бу 13 баһаарга барыта 65,6 гаа сир умайбыт, ол иһигэр тыата — 33,6 гаа. Түөрт баһаар киһи буруйуттан, тоҕус баһаар кураанах этиҥтэн барбыта биллибит. Уус Алдаҥҥа бэс ыйын 23 күнүттэн баһаары утары кытаанах эрэһиим биллэриллибитин бэлиэтээтэ. Онуоха өрөспүүбүлүкэ үрдүнэн тыа баһаарын умуруорааччылар үксүлэрэ Таатта баһаарыгар сылдьалларын этэн туран, күн бүгүн этиҥ кэлэн ааһарын ыйан, баһаар тахсар түгэнигэр нэһилиэнньэ көмөтө наада буоларын, онуоха нэһилиэк баһылыктара дьону бэлэмнииллэригэр көрдөстө.
Ити кэнниттэн мунньахха сүөһү аһылыгын бэлэмнээһин туһунан тыа хаһаайыстыбатын улуустааҕы управлениетын начаалынньыга Артем Сивцев, нэһилиэнньэ флюорографияҕа түһүүтүн туһунан фтизиатр быраас Ньургуяна Ширяева, нэһилиэктэр тула баһаары утары минбалаһалары оҥоруу туһунан ЫБМ улуустааҕы эппиэттиир сэкирэтээрэ Василий Макаров, докумуоннарга уларыйыы киириитин туһунан дакылааты экономика управлениетын начаалынньыга Павел Семенов оҥордулар.
Мария АРГУНОВА