Бороҕон нэһилиэгин талба талааннааҕа, «Көмүлүөк» Үһүс саас оскуолатын көхтөөх чилиэнэ, уран тарбахтаах иистэнньэҥэ, Уус Алдан улууһун норуотун маастара Анастасия Габышева Кэбээйи улууһугар ыытыллыбыт Олоҥхо ыһыаҕар саха норуотун уонна Саха сирин төрүт олохтоох омуктарын таҥаһын көрүүгэ «Омук төрүт таҥаһын өйдөбүнньүгэ» күөн күрэскэ өбүгэ ииһин сөргүтэн дьиэ кэргэнигэр тириини таҥастаан тикпит сүдү үлэлэрэ дьүүллүүр сүбэ быһаарыытынан үрдүктүк сыаналанан бастакы үрдэли ылан кыайыылааҕынан ааттанна. Уран тарбахтаах иистэнньэҥмит тирииттэн, түүлээхтэн үлэлэрэ, дьон-сэргэ үрдүк сыанабылын, сэҥээриитин, махталын ылыан ылла.
Анастасия Гаврильевна өссө Дьокуускайга ыытыллыбыт Туймаада ыһыаҕар уус-уран оҥоһуктар күрэстэригэр бастакы миэстэни ылбыта, өрөспүүбүлүкэтээҕи, улуустааҕы үгүс быыстапкаҕа ситиһиилээхтик кыттан кыайыылаах үрдүк аатын ылар. Кини «Көмүлүөк» Үһүс саас оскуолатын чилиэннэрин иискэ уһуйар, маастар кылаастары ыытан үөрэтэр.
Биһиги, биир дойдулаахтара, уран тарбахтаах иистэнньэҥмитинэн киэн туттабыт уонна СӨ норуотун маастара буоларыгар эрэнэбит.
Светлана Прудецкая, библиотекарь, «Көмүлүөк» Үһүс саас оскуолатын салайааччыта, уопсас. кэрэсп.