Анал байыаннай дьайыы кыттыылааҕа, Эр санааланыы уордьан кавалера Белолюбскай Күндүл Иванович сырдык кэриэһигэр Бүтүн Арассыыйатааҕы «Зарница 2.0.» бырайыак чэрчитинэн «Кыайыы стартара» кустовой байыаннай- патриотическай эстафета олунньу 25 күнүгэр буолан ааста. Күрэххэ Өспөх, Дүпсүн, Өнөр, Найахы оскуолаларын хамаандалара кытыннылар.
Тэрээһиҥҥэ буойун төрөппүттэрэ, аймахтара, доҕотторо, нэһилиэк дьаһалтата, оскуола кэлэктиибэ кыттыыны ыллылар, күрэх бириистэрин туруордулар. Күннэй Спиридоновна, Иван Иванович Белолюбскайдарга Саха сирин дьиэ кэргэттэрин общественнай сойууһун аатыттан Анал байыаннай дьайыы буойуннарын кэриэстэригэр «Аҕа дойдуну көмүскээччи ийэтэ», «Аҕа дойдуну көмүскээччи аҕата» мэтээллэри олохтоох дьаһалта баһылыгын солбуйааччы Егор Федоров туттарда. Буойун сырдык мөссүөнүн ахтан-санаан уонна ыччакка кэс тылларын нэһилиэк баһылыга Петр Слепцов, Күндүл ийэтэ Күннэй Белолюбская, маҥнайгы учуутала Надежда Белолюбская, оҕо сааһын доҕоро Айсен Караканов тиэртилэр.
Күрэх кыттааччылара үчүгэй бэлэмнээхтэрин, бары көрүҥҥэ сатабыллаахтарын көрдөрдүлэр.
Ол курдук маннык түмүктэр таҕыстылар:
- 1-кы миэстэ – М.М. Стрекаловскай аатынан Өнөр орто оскуолата
- 2-с миэстэ – И.И. Гоголев-Дыргыабай аатынан Найахы орто оскуолата
- 3-с миэстэ – И.Н. Жирков аатынан Дүпсүн орто оскуолата.
- «Кыайыыга дьулуурун иһин» анал аат – Өспөх орто оскуолатын үөрэнээччилэригэр туттарылынна.
Ону тэҥэ анал ааттар ааттаннылар:
- «Бастыҥ ытааччы» – Лукачевскай Николай (Өнөр), Пестрякова Аина (Өспөх);
- «Маҥнайгы көмөнү оҥорууга бастыҥ» – Жирков Антон (Дүпсүн);
- «Боевканы түгэнник кэтиигэ бастыҥ» – Федоров Егор (Найахы);
- «Пневматическай сааны ыһыыга, таҥыыга бастыҥ» – Жирков Артем (Дүпсүн);
- «Көмүскүүр кэмпилиэги кэтиигэ бастыҥ» – Ушницкая Аэлита (Өнөр).
Аҕа дойдуну көмүскээччи Белолюбскай Күндүл Иванович сырдык аатын үйэтитэр тэрээһиҥҥэ күүс-көмө буолбут дьоммутугар-сэргэбитигэр уонна күрэххэ үөрэнээччилэрин үрдүк таһымнаахтык бэлэмнээн кытыннарбыт ОБЗР учууталларыгар: Протопопов Юрий Николаевичка (Өнөр), Охлопков Александр Николаевичка (Дүпсүн), Иванов Кирилл Петровичка (Өспөх), Румянцев Раймонд Петровичка (Найахы) махталбытын тиэрдэбит.
Анна Федорова