Бу күн 85 сыл анараа өттүгэр Мындаабаҕа МТС иһинэн аһыллыбыт тырахтарыыстар куурустарын бүтэрэн 60-тан тахса кыыс тимир көлөҕө олорон үлэлэрин саҕалаабыт күннэринэн биллэр. Бу бэлиэ күнү таба тутан Мындаабаҕа бүгүн “Өйдүүбүт, махтанабыт, эһиэхэ сүгүрүйэбит” тэрээһин буолан ааста.
Мындааба сэлиэнньэтин бэтэрээннэрэ, тырахтарыыс кыргыттар оҕолоро, аймахтара Роман Николаевич Дьяконов аатынан «Кинилэр кыайыыны уһансыбыттара» сквергэ мустаннар сибэкки дьөрбөтүн уурдулар, хоһуун дьон олоҕун ахтан-санаан аастылар.
Тэрээһиҥҥэ Мүрү нэһилиэгин баһылыга Прокопий Румянцев кытынна, кини сквер өссө да дьону угуйарын, ып-ыраас былаһааккалааҕын, тулата сибэккинэн симэнэн турарын биһирээтэ уонна үүннээччи-тэһииннэччи Людмила Андросоваҕа махтал суругу туттарда.
Бары да кэлбит дьон сквер сибэккинэн симэммитин сэргии көрдүлэр, 160-ча сибэккини үүннэрэн бүөбэйдии, сквери көрө-истэ сылдьар Августина Индееваҕа махтаннылар.
Тырахтарыыс кыргыттар ааттарын үйэтитээри Людмила Афанасьевна үгүс сыратын-сылбатын уурбута – кини көҕүлээһинэн сквер тутуллубута, онтон “Тимир көлө тэһиинин тутан” кинигэ тахсыбыта, тырахтарыыс кыргыттар тустарынан сценарий суруллан киинэ уһуллубута. Ону тэҥэ сквер 2022 сыллаахха бүттүүн өрөмүөннэнэн иккис тыыннаммыта. Билигин даҕаны, төһө да куоракка олордор, Людмила Афанасьевна үйэтитэр үлэтин тохтоппот – «Саха» НКИХ ханаалыгар, «Тэтим» араадьыйаҕа, өрөспүүбүлүкэ хаһыаттарыгар урут үлэлээн ааспыт дьону, үлэлэрин-хамнастарын сырдатар матырыйааллары тиксэрэ, тиэрдэ сылдьар эбит.
Тэрээһин түмүктэнэрин саҕана Людмила Афанасьевна викторина оонньотто, ыйытыылара тырахтарыыс кыргыттар үлэлии сылдьыбыт кэмнэрин уонна үйэтитэр үлэтигэр сыһыаннаахтар. Бары күлэ-үөрэ, уруккуну-хойуккуну ахтыһа-санатыһа, инникини торумнаан сыал-сорук туруорунар бэртээхэй тэрээһин буолан ааста.
Анатолий Кириллин