Бүгүн В.А. Вонгродскай аатынан Дьокуускайдааҕы медицинэ колледжын Бороҕоннооҕу филиалын выпускниктарыгар дипломнарын туттарыы үөрүүлээх түгэнэ буолла. Ол курдук сиэстирэ идэтигэр үөрэммит 15 выпускникка орто анал үөрэҕи бүтэрбитин туһунан диплому (ол иһигэр түөрт кыһыл) колледж дириэктэрэ, РФ үтүөлээх бырааһа, РФ үөрэхтээһиҥҥэ уонна иитиигэ бочуоттаах үлэһитэ Дмитрий Алексеев туттарда, итиэннэ устудьуоннарга билиилэрин биэрбит преподавателлары уонна филиал устудьуоннара дьаныардаах үөрэхтэрин таһынан улууска, үөрэх кыһатын иһинэн бары уопсастыбаннай үлэҕэ көхтөөхтүк кыттан кэлбиттэрин бэлиэтээн туран, көхтөөх устудьуоннары наҕараадалаата.
Үөрүүлээх тэрээһиҥҥэ эҕэрдэ тылы Г.Г. Никифоров аатынан Уус Алданнааҕы киин балыыһа кылаабынай бырааһа Сергей Черкашин, кылаабынай бырааһынан үлэлээбит Анна Петрова, улуус баһылыгын солбуйааччыта Дмитрий Сторожев, Мүрү нэһилиэгин баһылыга Прокопий Румянцев эттилэр. Ону тэҥэ эҕэрдэ тылы Медицинэ колледжын Бороҕоннооҕу филиалын сэбиэдиссэйэ Любовь Нестерева, бөлөх куратора (СД-22Б) Индира Захарова эттилэр.
Санатан эттэххэ, улууспутугар Дьокуускайдааҕы медицинэ колледжын филиала, кылаабынай бырааһынан үлэлээбит Анна Петрова көҕүлээһининэн 2022 сыллахха арыллыбыта. Ол курдук, 2022-2023 үөрэх сылыгар «Лечебное дело» уонна “Сестринскаое дело” диэн икки бөлөх арыллан үөрэх саҕаламмыта.
Бүгүн бу филиал бастакы хараҥаччылара кынат анньынан көттүлэр, кинилэр бары идэлэринэн улууспут иһигэр үлэлэрин саҕалыахтара, дьон-сэргэ доруобуйатын туһугар кыһамнньыларын ууруохтара.
