Мүрү олохтооҕо, элбэх оҕолоох дьиэ кэргэн аҕата Максим Васильев балаҕан ыйын 2 күнүгэр Майаҕатта Бэрт Хара стадионугар, сүүрүү декадатын арыйар үөрүүлээх тэрээһинигэр маастар-кылаас ыытарын истэн тиийэ сылдьыбыппыт.
Кини ДьУоКХ Уус Алданнааҕы салаатыгар автоматизация электригинэн үлэлиир. Бэйэтэ оҕо эрдэҕиттэн саахыматчыт, федерация чилиэнэ. 2022 сыллаахха Мындааба спортивнай оскуолатын интернатыгар уолун буоксаҕа дьарыкка аҕаларыгар атын саалаҕа охчуттар дьарыктаналларын көрөр эбит, сэргээн холонон көрөргө санаммыт. Саха сирин оҕунан ытыыга спордун маастара Надежда Прокопьева дьоҕурдааҕын бэлиэтии көрөн бу дьарыкка угуйбут, оҕунан ытыы ымпыгын-чымпыгын кэпсээн, көрдөрөн, туруоран биэрбит. Онтон ыла ох саа, оноҕос, инвентарь ылынан дьарыкка сылдьар буолбут, күрэхтэри кэрийбит. Күрэхтэн күрэххэ кыайара-хоторо үксээбит, Өрөспүүбүлүкэ иһигэр үчүгэй түмүктэри көрдөрбүт, ол да иһин икки сыл иһигэр Саха сирин спордун маастарыгар кандидат нуорматын толорбут.
Ити сылдьан оҕунан ытыыга 3Д сыаллары ытар дисциплина баарын билэн, боруобаҕа диэн дьарыктанан саҕалаабыт уонна номнуо 2025 сыллаахха Арассыыйа чемпионатыгар бастакы миэстэ буолан бэйэтэ да соһуйбут. Дьэ онтон ыла Арассыыйа, аан дойду таһымнаах күрэхтэргэ элбэхтик кыттан быйыл, атырдьах ыйыгар Арассыыйа спордун маастарыгар кандидат нуорматын толордо.
Максим Васильев:
– Тэрээһиҥҥэ олус элбэх киһи, быһа барыллаан 50-ча киһи оҕунан ытан көрдүлэр, бу көрүҥү олус сэргээтилэр, астыннылар. Оҕунан ытыы ох саа көрүҥүнэн уонна дисциплинатынан арахсар, биһиги Надежда Прокопьеваны кытары бу тэрээһиҥҥэ традиционнай ох саанан 3Д сыал дисциплинаҕа ыттаран көрдөрдүбүт. Бу 3Д сыаллар Арассыыйа, Европа, аан дойду күрэхтэригэр киирсэр сыаллар буолаллар. Өссө бу көрүҥҥэ Арассыыйа, Аан дойду спордун маастарыгар нуорматын толоруоххун сөп, онон олус интэриэһинэй, сэргэх көрүҥ.
3Д сыаллары айылҕаҕа таһааран, ол сир усулуобуйатыгар ууран күрэхтэһии тэрийэллэр. Сыаллары араас кэрчиккэ, холобур, сыыр үрдүгэр, тыа маһыгар, оҥхойго, күөл нөҥүө туруорбуттарын ытыахтааххын. Онон дьиҥнээх булт эйгэтигэр сылдьар курдук азарт үөскүүр.
Тус санаабар билиҥҥи сыыппара технологиятын үйэтигэр дьиэҕэ хаайтара олорбокко дьон айылҕаҕа тахсан оҕунан ытыынан дьарыктанан, тыаҕа элбэхтик хааман эти-хааны чэбдигирдэрэ туһалаах, астык буолуо этэ.
Кэлэр өрөбүллэргэ улууска маҥнайгытын оҕунан ытыыга 3Д күрэхтэһии тэрийээри сылдьабыт. Элбэх кыттааччы кэлэрэ күүтүллэр.
Онтон бу ыйга, сотору, дойдулар икки ардыларынааҕы Горно-Алтайск куорат Манжерок курортнай сиригэр «Стрелы Алтая» диэн күрэххэ ох курдук оҥостон бараары дьаныардаахтык бэлэмнэнэ сылдьабын.
Ытыалыы сылдьар 3Д сыаллар сыаналаахтар, холобурга куобах уонна андаатар 8-9 тыһыынча солкуобай, онтон тыатааҕы 51 тыһыынча. Хайдах ылынабын дии сылдьан хата социальнай контракт диэн баарын истибитим. Бырайыак оҥорбутум уонна контракт ылыытыгар кыттыбытым. Мин дьолбор улуус салалтата, хамыыһыйа өйөөн көмөҕө тиксибитим.
Күрэхтэһии кэнниттэн спорт дыбарыаһын кытары сөбүлэҥ түһэрсэр былааннаахпын, наардал оҥороммун улахан дьону, оҕолору дьарыктыыр баҕа санаалаахпын.
Оҕунан ытыы көрүҥэр киһи сааһа оруолу оонньообот, илии-атах хамсыыр, көрөр-истэр буоллуҥ да киһи сатаан ытар. Сүрүнэ бу спорт көрүҥэр интэриэс уонна баҕа санаа наада. Үлүһүйэн дьарыктанарга ордук тулуур, дьулуур уонна дьаныар ирдэнэр. Ханнык баҕар спортивнай көрүҥҥэ курдук, оҕунан ытыыга биир кэм утулуппакка дьарыктаныы, күрэхтэргэ кыттыы ситиһиилэргэ тириэрдэр.
Маҥнай саҕалыырга ох саа, оноҕос, тарбахха кэтиллэр напальчник ылыаххытын сөп. Дьокуускай куоракка ити этиллибит тэриллэри атыылыыр маҕаһыыннар элбэхтэр.
Бэйэбин эттэххэ, иннибэр үлэм өссө элбэх. Кандидат буолбутум кэнниттэн аны маастар нуорматыгар дьулуһабын. 3Д көрүҥҥэ Арассыыйа спордун маастара Александр Дьяконовтыын үлэлэһэ сылдьабын.
Кэпсэттэ: Анатолий Кириллин