Хоро нэһилиэгэр СӨ Бырабыыталыстыбатын отчуоттур мунньаҕар урут бастаан өр сылтан туруорсууларын саҥа оскуола тутуутун эттилэр. Эргэрбит, тэллэйдэммит икки этээстээх мас оскуола кутталлаах туруктааҕын тоһоҕолоон бэлиэтээтилэр. Билигин оскуола бырайыагын оҥотторон эрэллэр эбит, ол түмүктэннэ эрэ уочаракка ылан, балаһыанньаны учуоттаан тутууну түргэтэтэри көрдөстүлэр.
Онуоха долгутар түгэнинэн Майаҕас орто оскуолатын 6-с кылааһын үөрэнээччитэ Айыллаана Тарабукина оскуола үөрэнээччилэрин аатыттан саҥа оскуоланы тутары көрдөспүтэ буолла уонна дьүөгэтэ Сандаара Ушницкая ыра санаатын – аныгылыы, сырдык, тупсаҕай оскуоланы уруһуйдаабытын – отчуоттуур бөлөх салайааччытыгар СӨ үөрэхтээһиҥҥэ уонна наукаҕа миниистирин 1-кы солбуйааччы Ньургун Павловка туттарда.
Иккиһинэн, нэһилиэнньэ арҕаа өттө ититиигэ холбонорун туруорсаллар. Онуоха бөһүөлэк ортотугар турар мас хочуолунайы аныгылыы саҥардан, кыамталаах оһохтору көрөн, носуоһу күүһүрдэн холбонор баҕаларын эттилэр. Ону сэргэ айан суолун кытыытыгар олорор бөһүөлэк Чараҥ, Майаҕас икки ардыгар айан суолугар асфальт уурдаран быылтан босхолонор баҕа санааларын тиэртилэр.
Чараҥҥа эмиэ 100 сыл анараа өттүгэр тутуллубут үс салҕааһыннаах, тэллэй буолбут хаарбах туруктаах оскуола дьиэтин солбуйар саҥа тутууну олохтоохтор өрүү туруорсубуттара өр буолла. Ону сэргэ сэбиэскэй кэмҥэ бөһүөлэк олохтоохторо бэйэлэрин күүстэринэн туппут социальнай эбийиэктэрэ туралларын, судаарыстыбаттан үбүлэммит тутуу суоҕун хараастан туран эттилэр. Итиэннэ бөһүөлэк аҥаара ититиигэ холбонор, ураты харыстанар айылҕалаах Нэлээн сирэ кууран-хатан турарынан нүөлсүтэр үлэ, уот линиятыгар өрөмүөн, остуолбалар саҥардыллаллара, айан суолу буорун хаптатар ньыманы тобулар, уот-күөс, суол бэлиэтэ турара уолдьаспытын туһунан эттилэр. Балыыһа, кулууп дьиэлэрэ эргэрбитин, библиотека дьиэтэ суоҕун бэлиэтээтилэр.
Түмүккэ отчуоттуур бөлөх салайааччыта Ньургун Михайлович СӨ Тыа хаһаайыстыбатын министиэристибэтин махтал суругун өр сыллаах үлэтинэн тыа хаһаайыстыбатын сайыннарыыга кылаатын иһин урбаанньыт Николай Ябловскайга туттарда.
Мария Аргунова