Бүгүн Монголияҕа мас тардыһыытыгар сэттис төгүлүн ыытыллар норуоттар икки ардыларынааҕы чемпионат саҕаланар. Бу улахан түһүлгэҕэ Саха сирин хамаандатын Уус Алдантан төрүттээх биир дойдулаахпыт Иван Степанович Готовцев салайан илдьэ сылдьар. Спортсменнар бэҕэһээ тиийэн, оннуларын-олохторун булуннулар.
Тэрийээччилэр күрэхтэһии буолар түһүлгэтин Айханзар диэн куораттан уонча килэмиэтир тэйиччи сиргэ хайа тэллэҕэр анаан, төрүт истиилинэн киэргэппиттэр. 3000 киһи олорон көрөр тырыбынатыгар билиэт эрдэттэн бүппүт. Түһүлгэ ортотугар тирии барабааннар туруоруллубуттар. Онон күрэхтэһии тыҥааһыннаахтык, ыһыылаахтык-хаһыылаахтык ыытыллар чинчилээх. Стадион кэтэҕэ аһыыр, атыы-эргиэн түһүлгэлэринэн толору. Дьон күрэхтэһиини астына, дуоһуйа көрөн барар усулуобуйалара тэриллибит.
– Дьиктитэ диэн, күрэхтэһиибит киэһэ 20 чаастан чемпионаты арыйыы кэнниттэн саҕаланар, – диэн уопсастыбаннай тириэньэр Петр Перевалов миэстэтиттэн билиһиннэрэр. Бэҕэһээ буолбут көрсүһүүгэ Ил Түмэн Ыччакка, физическэй култуураҕа уонна успуорка бастайааннай кэмитиэтин бэрэссэдээтэлэ Михаил Гуляев, Саха сирин успуорка миниистирэ Леонид Спиридонов, мас тардыһыытын федерациятын бас-көс дьоно кыттыннылар.
Спортсменнар истиэнэни кыйа турар ороннордоох юрталарга түстүлэр. Суунар тээбириниттэн сотторугар, утуйар таҥаһыгар тиийэ барыта кичэйэн бэлэмнэммит.
Ыалдьыттар анал талонунан ас-үөл дэлэччи тардыллыбыт сиригэр тото-хана аһыыллар. Биллэрин курдук, монгол аһа, сүрүннээн, эттэн турар. Эти, атын да аһы астыктык астыыр, дэлэй-холой аһыыр норуот быһыытынан биллэр.
Аан дойду күрэхтэһиитигэр 33 дойдуттан 193 кыттааччы кэлбит. Уус Алдантан балай да элбэх киһи тиийбит. Мас-рестлинг аан дойдутааҕы федерациятын вице-бэрэсидьиэнэ Петр Бурнашев, СӨ үтүөлээх тириэньэрэ Иван Готовцев, “Модун“ спортивнай комплекс салайааччыта Геннадий Васильев, 50 кг кыттар Уһун Күөлтэн Кеша Охлопков, 70 кг кыттар успуорт маастара Айсиэн Мигалкин, 85 кг Айсен Атастыров,105 кг Дмитрий Попов, ону тэҥэ түөрт тириэньэр бааллар.
“Монголияҕа үгүстэр бастакыбытын сылдьабыт. Айылҕата, ото-маһа дьикти, ураты. Очуос хайалара, таастаах үрэхтэрэ астыктар. Ыалдьыттары оннук кэрэ айылҕалаах ытык сиргэ илдьэн, эмиэ ас эгэлгэтинэн күндүлээтилэр. Ити сиргэ бэл олохтоохтор да сылдьыбаттар, ыраахтан кэлбит эрэ дьону киллэрэллэр эбит”, – диэн Петр салгыы сэһэргиир.
Монголия истиэп дойду буолан, эрдэ хараҥарар, тымныйар. Спортсменнар оһоҕунан оттуллар юрталарга сынньалаҥнык утуйан тураллар. Бүгүн Кеша Охлопковы кытта Айсиэн Мигалкин киирсэллэр. Өйүүн Айсен Атастыровы кытта Дмитрий Попов аан дойду ааттаахтарын кытта күөн көрсүүгэ тахсыахтара. Уолаттарбытыгар ситиһиини баҕарабыт!
Уйаара КУСТУК