Быйыл сайын сатыылыаҕыттан улууспут киинигэр кытаанах бөҕү тоҕор туочукаларбыт хомуллан быстыбакка, нэһилиэкпит көстүүтэ барыбытын долгуппута. Ол төрүөтүнэн бөх туочукалары хомуйар эбээһинэстээх «Экологические системы Якутии» тэрилтэҕэ бөҕү тиэйэр массыынаҕа үлэҕэ киирбит киһи эппиэтинэһэ суоҕа буолла. Онно эбии кини кэнниттэн үлэҕэ киирбит икки үлэһит аккаастаммытынан, кэлин үлэһит көстөн быстыбакка, бөхпүт кыайа-хото хомуллубакка мунньуллан, туолан таһынан баран, ону тыал-куус көтүтэн туочукалар эргин сирдэр бөҕүнэн ыһыллыбыттара.
Мүрү нэһилиэгин дьаһалтата бу кыһалҕаны туоратыыга Мүрү нэһилиэгин дьаһалтатын эр дьоно уонна түөлбэлэр олохтоохторо көмлөһөннөр, бэҕэһээттэн күүстээх субуотунньуктар буола тураллар.
Ол курдук, бэҕэһээ Окоемов аатынан уулусса саҕаланыыта уонна Алданская уулуссаҕа турар туочукалар, аттынааҕы ыһыллыбыт бөхтөр бүтүннүү ыраастаннылар. Бүгүн гимназия таһыттан саҕалаан Мындааба туочукатыгар тиийэ субуотунньук ыытыллара былааннанар.
Субуотунньукка Мүрү нэһилиэгин баһылыга Прокопий Румянцев бэйэтэ иилээн-саҕалаан үлэлэһэ сылдьар. Кини этэринэн, улуус дьаһалтатын, региональнай операторы кытта үлэлэһэннэр, икки нэдиэлэнэн Сангаартан бөҕү тиэйэр иккис массыына кэлэрэ күүтүллэр эбит. Үлэһиттэр өттүгэр эттэххэ, суоппар уонна оробуочай көстүөх курдук: суоппар бүгүн эбиэт кэннэ үлэҕэ тахсыан сөбүн туһунан эппит, онон балаһыанньа көнөрүгэр эрэнэр. Бу туһунан сиһилии видео-комментарийга истиҥ.
Кыһалҕалаах күннэргэ норуот күүһэ түмүстэҕинэ тугу тулутуой? Кэлэр нэдиэлэҕэ маннык субуотунньук салҕанара сабаҕаланар, онон түөлбэ олохтоохторун үүнэр-сайдар кэскиллээх, олорор дьиэбит – Мүрүбүт барахсан – чэгиэн, ыраас буоларын туһугар субуотунньукка тахсан көхтөөхтүк кыттыахха диэн ыҥырабыт!
Мария Аргунова