Быйылгы үөрэх сылыгар үөрэх үлэһиттэрин улуустааҕы спартакиадатыгар Мүрү 1-кы №-дээх орто оскуолатыгар сыһыарыллыбыт уһуйааннар үлэһиттэрин кытта холбоһуктаах хамаанда I миэстэни сурунан кыайыы өрөгөйүн билбитэ.
Бу хамаандаттан хас да киһи улуус хамаандатыгар киирэн илин эҥээр улуустарын үөрэҕин үлэһиттэрин XXXVIII спартакиадатыгар ситиһиилээхтик кытыннылар, уопсай түмүккэ хамаанда бастакы миэстэни ыларыгар төһүү күүс буоллулар.
Иван Винокуров, оскуола физкултуураҕа учуутала, шведскэй эстафетаҕа кыайбыт хамаанда чилиэнэ:
– Шведскэй эстафета түөрт этаптан турар. Бастаан 800 миэтэрэҕэ, ол эбэтэр манеһы түөртэ эргийии, эдэрдэргэ ДЮСШ чэпчэки атлетикаҕа тириэньэрэ Иннокентий Колодезников сүүрбүтэ. 400 миэтэрэҕэ ДЮСШ чэпчэки атлетикаҕа тириэньэрэ Мария Слепцова барбыта. Оттон 200 миэтэрэҕэ 50-тэн үөһэ саастаахтарга мин, бүтэһик этапка 100 миэтэрэҕэ ДЮСШ баскетболга тириэньэрэ Марина Пухова сүүрбүппүт. Мэҥэ Хаҥалас сүүрүктэрэ II миэстэни ылбыттара, III миэстэҕэ аммалар тахсыбыттара.
Иван Сосин
Иван Сосин, 15 нүөмэрдээх «Кэскил» уһуйаан рабочайа, пневматическай саанан ытыыга хамаанданан бастакы ылбыт күрэхтэһээччи:
– Мин 2023 сыллаахха спартакиадаҕа ытыыга күрэхтэспитим. Ол кэнниттэн сөбүлээн дьарыктанабын. Үс буолан ыппыппыт. Түмүк хамаанда бириэмэтинэн тахсыбыта. Биһиги Чурапчы, Таатта ытааччыларын II уонна III миэстэлэргэ хаалларан кыайдыбыт. Бириэмэбит, ытыыбыт хаачыстыбата куһаҕана суоҕа. Үөрүүбүт улахан. Спартакиада үрдүк таһымҥа ааста.
Анастасия Ксенофонтова, оскуола логопеда, волейболга хамаанда чилиэнэ:
– Волейбол хатыһыылаах киирсиитигэр кыргыттарга I миэстэни ыллыбыт. Эрдэттэн түмүллэн бэлэмнэммиппит, оонньуур кыахпытын, таһыммытын билсэбит. Мээчик көрүҥүнэн оскуолаттан сөбүлээн дьарыктанабын. Волейболга сыһыарбыт, уһуйбут тириэньэрбинэн Максим Аммосов буолар. Хамаандаҕа сүрүннээн нападающай буолабын. Күүстээх волейболисткаларынан биллэр аммалар – II миэстэ, мэҥэлэр III миэстэ буоллулар. Түмүкпүтүттэн үөрэбит. Барыбыт кыайыыта буолар.
Дайаана Сивцева, оскуола английскай тылга учуутала:
– Оскуола эрдэхпиттэн саахыматтыыбын. Михаил Ушницкайга дьарыктаммытым. Бу спартакиадаҕа 5 очкону ылан дуоскабар эрэллээхтик бастаатым. Элбэх турнирга кыттыбытым туһалаата. Оттон хамаанданан II миэстэ буоллубут.
Елена Сыроватская, уопсас. кэрэсп.