Быйылгы куонкурус Арассыыйаҕа норуоттар сомоҕолоһууларын сылыгар уонна Мүрү 1-гы №-дээх орто оскуолатыгар бибилэтиэкэринэн үлэлээбит Герой-Ийэ Екатерина Ивановна Александрова (Мигалкина) төрөөбүтэ 100 сылыгар ананна.
Куонкурус көҕүлээччитинэн, сүрүн спонсорынан оскуоланы 1973 сыллаахха үөрэнэн бүтэрбит РФ уопсай орто үөрэхтээһинин бочуоттаах үлэһитэ, СӨ үөрэҕириитин туйгуна, «Учууталлар учууталлара» бэлиэ хаһаайына Полина Ивановна Готовцева буолар.
Оскуола бастыҥ үөрэнээччилэрэ Анжелика Москвитина, 10″а» кылаас, уонна Валентин Гоголев, 11″а» кылаас, мустубут дьону эҕэрдэлээн туран куонкуруһу астылар. 3 «а» , 4 «а» уонна 4 «в» кылаастар үөрэнээччилэрэ уус-уран монтаһы ааҕан саҕалаатылар (сал. Е.С. Парникова). 8 «б» кылаас үөрэнээччитэ Айлаана Бурцева Мүрү орто оскуолатыгар бибилэтиэкэринэн үлэлээбит Герой-Ийэ Екатерина Ивановна Александрова туһунан суруйбут үлэтин билиһиннэрдэ. Оскуола дириэктэрин иитэр үлэҕэ солбуйааччы Михаил Охлопков, оскуола педагог-бибилэтиэкэрэ Люция Бурцева кыттааччыларга үчүгэй түмүгү баҕаран тыл эттилэр.
Куонкурус үс түһүмэҕинэн ыытылынна. Түмүккэ кыайыылаах үрдүк аатын ыллылар:
- 1-кы м. – Эллина Цой, 10 «а» кылаас үөрэнээччитэ, ийэтэ Валентина Иннокентьевна, эбэтэ Надежда Николаевна (кыл. сал. Н.И. Лазарева);
- 2-с м. – Арина Кайдалова, 7 «б» кылаас үөрэнээччитэ, эбэтэ Майя Владимировна, хос эбэтэ Анна Николаевна (кыл. сал. Д.Д. Гаврильева );
- 3-с м. – Алгыстаана Сивцева, 5 «в» кылаас үөрэнээччитэ, ийэтэ Варвара Михайловна (кыл. сал. М.А. Петухова ).
Куонкурус кыайыылаахтарыгар П.И. Готовцеваттан уонна Л.В. Бурцеваттан харчынан бириэмийэ, ону тэҥэ хас биирдии кыттааччыга Полина Ивановна аатыттан кинигэ бэлэх туттарылынна. Уус Алдан улууһун үөрэх управлениетын информационнай- методическай отделын начальнига Клара Троева, иитии үлэ уонна эбии үөрэхтээһин салаатын сүрүн специалиһа Ефросинья Слепцова туруорбут «Лучшая рекомендация по чтению» анал аат Цойдар дьиэ кэргэнигэр туттарылынна. Арина Кайдаловаҕа Е.И. Александрова оҕолорун Мигалкиннар аатыттан анал бириис ананна.
Куонкуруска кыттыбыт дьиэ кэргэттэр оҕоҕо ааҕыыга тапталы кыра сааһыттан иҥэриини көрдөрдүлэр. Ааҕыыга туһуламмыт баай уопуттарыттан үллэһиннилэр, билиһиннэриигэ саҥа, сонун формалары көрдөрдүлэр.
Кыайыылаах аатын ылбыт Цой дьиэ кэргэнин ийэтэ Валентина Цой санаатын үллэһиннэ:
– Оҕо көрөн үөрэнэр, онон бэйэҥ кинигэ аахпат буоллаххына, оҕоттон ирдиир ыарахан. Биһиги дьиэ кэргэн оҕолорбутугар кыра эрдэхтэриттэн араас остуоруйа, кэпсээн, дьэрэкээн ойуулаах кинигэлэри атыылаһан ааҕарга интэриэһи тарда сатаабыппыт. Бэйэбит дьиэбитигэр, бары аймахтарбытыгар баай бибилэтиэкэлэрдээхтэр, икки өттүттэн эбэлэрбит, эһэлэрбит сахалыы кинигэни ааҕалларын ордороллор. Оттон аҕабыт историческайы, мин детективтары, улахан кыыспыт Клава классическай айымньылары, мотивационнай кинигэлэри, иккис кыыс Инна анимены, уолбут Эдуард манга кинигэлэри, кыра кыыс Эллина оскуола бырагырааматыгар баар кинигэлэри уонна аныгы ааптардары ааҕарын сөбүлүүр.
Куонкуруска Эллинаны кытта мин уонна эбэбит, Мындааба орто оскуолатын дириэктэрин научнай үлэҕэ солбуйааччы Надежда Николаевна кытынныбыт. Түһүмэхтэр аайы толкуйдаан бэлэмнэммиппит. Кинигэни ааҕарга сүбэ түһүмэҕэр Элинор Портер «Поллианна» кинигэтин талбыппыт, оонньуу толкуйдаабыппыт. Барыта табыллыбытыттан үөрэбит.
Эллина 10-с кылааска үчүгэйдик үөрэнэр, «Кэнчээри» ансаамбылга хор группатын старостата, үҥкүүлүүрүн сөбүлүүр. Бэйэм нуучча тылын учуутала идэлээхпин, билигин «Сахателеком» Бороҕоннооҕу учаастагар инженеринэн үлэлиибин. Ааҕар киһи билиилээх буоларын бары да өйдүүбүт. Кинигэни төһө кыалларынан ааҕа, оҕолорго ааҕыыны сүбэлии, өйүү сылдьыҥ.
Куонкурус бэрт сэргэхтик ыытыллыытыгар оскуола бибилэтиэкэтин үлэһиттэрэ Люция Бурцева, Дианна Гаврильева сыраларын уурбуттара көһүннэ.
Елена Сыроватская, уопсас. кэрэсп.