Байыаннай дьайыыга кытта сылдьар биир дойдулаахтарбытыгар күүс-көмө, өйөбүл буолар санаабыт уҕараабат.
Лөгөй нэһилиэгин дьаһалтата уонна волонтердара байыаннай дьайыыга көмөлөһөр сыаллаах харчы хомуйарга нэһилиэнньэҕэ ыҥырыы таһаарбыттара, онуоха олохтоохтор көхтөөхтүк кыттаннар, барыта 74 277 солк. суума хомуллубут. Онон бу күннэргэ хаххалыыр сиэккэни өрөр матырыйаалларын ылбыттарын туһунан нэһилиэк депутата Дмитрий Шарков иһитиннэрдэ:
– Бастатан туран, харчы хомуйуутугар көхтөөхтүк кыттыбыт нэһилиэгим дьонугар улахан махталбытын тиэрдэбит. Матырыйаалбытын Москваттан «Садовод» диэн ырыынактан ыллардыбыт. Ууну тэйитэр плащ биир миэтирэтэ – 80 солк. Биһиги «Оксфорд хаки», «Оксфорд бежевый», «Камуфляж» диэн дьүһүннэртэн биирдии рулону, ол аата холбоон үс рулону ылбыппытыгар барыта 24 000 солк. барда. Хаххалыыр сиэккэни өрөргө 3*25 м иэннээх сиэккэ сыаната 2000 солк. Үс устууканы ылбыппытыгар 6000 солк. барда. Барслет өрөр «Паракорд» диэн шнур-быа 893 солк., оннук 10 устууканы ылбыппытыгар барыта 8930 солк. барда. Матырыйаалы көрдүүргэ 3061 солк. барда. Бу ылларбыт малбытын Дьокуускай куоракка суулаан ыытарга 1000 солк., таһаҕас Москваттан Дьокуускайга тиэллэн кэлиитигэр 3744 солк. барда. Онон холбоон барыта 46 745 солк. тутуннубут. Мунньубут счеппутугар 27 485 солк. ордунна.
Билигин Кэптэни бөһүөлэгин волонтера Мария Софронова 100 устуука браслеты номнуо өрдөрөн туттарда. Салгыы хаххалыыр сиэккэлэрбитин өрөргө нэһилиэнньэбит көхтөөхтүк турунуоҕа диэн эрэнэбит.
Ити курдук барыга-бары көхтөөх, түмсүүлээх нэһилиэк сотору кэминэн бэлэм буолбут хаххалыыр сиэккэлэрин хаартыскаҕа түһэрэн ыытыахтара диэн күүтэбит.
Мария АРГУНОВА