»Сайдам» Лөгөй интэринээт-лиссиэйин иһинээҕи тыйаатыр Уһук Илин түһүлгэтигэр чаҕылхай сулус буолан сандаарда. Эдэр артыыстар »Оскуола классиката» диэн Бүтүн Арассыыйатааҕы бырайыак »Оскуола театрдара» диэн номинация бастакы түһүмэҕэр кылбар кыайыыны ситистилэр. Бу бырайыак »Бастыҥнар хамсааһыннара» оҕо, ыччат Бүтүн Арассыыйатааҕы хамсааһынынан ыытыллар. Оҕолор ситиһиилэрэ күөн күрэскэ эрэ кыайыы буолбатах, бу — кэлэктиип федеральнай таһымҥа тахсыытыгар, сайдыытыгар тирэх саҕалааһын.
Бүтүн Уһук Илин федеральнай уокурук оскуолаларын тыйаатырын түмпүт сүүмэрдиир түһүмэххэ »Сайдам» ирдэбиллээх дьүүллүүр сүбэ иннигэр классическай айымньынан туруоруутун көрдөрдө. А.Н Островскай »Гроза» диэн айымньытыгар лиссиэй оҕолоро аныгы тыыны, ураты тыаһы биэрдилэр. Эспиэрдэр айымньы ис хоһооно арыллыытын, оҕо таһымыгар толоруу маастарыстыбатын, режиссер хорсун хаамыытын, аныгы сценографическай булумньутун, кэлэктиип биир тыыҥҥа киирэр уратытын үрдүктүк сыаналаатылар.
Ити барыта үтүмэн үлэ, биир санааҕа, иэйиигэ түмүллүү түмүгэр ситиһиллэр. Оҕолор да, учууталлар да уруоктар кэннилэриттэн хаалан дьарыктанан, саҥарарга, хамсанарга хос-хос чочуллан, таҥаһы-сабы тигиигэ эт илиилэринэн үлэлэһэн, элбэх түбүгү көрүстүлэр. Ол үлэ түмсүүнү күүһүрдүбүтэ, дьону биир тыыҥҥа түмпүтэ биллэр. Тыйаатыр салайааччылара — дириэктэр иитэр үлэҕэ сүбэһитэ Татьяна Михайловна Петухова уонна 9 кылаас үөрэнээччитэ Павел Герасимов бэлиэтииллэринэн, »Сайдам» — куруһуок эрэ буолбатах. Бу — киэҥ хайысхалаах үлэлээх бүтүн лаборатория. Онно оҕолор артыыс маастарыстыбатыгар эрэ буолбакка, эппиэтинэскэ, хардарыта көмөлөсүһэргэ, уустук тиэкиһи өйдөөн, ону дьоҥҥо тиэрдэргэ үлэлэһэллэр.
Лиссиэй айар тыыннаах эйгэни төрүттүүр. Ол түмүгэ — улахан түһүлгэҕэ кыайыы. »Бэйэбит испитигэр биэбэйдээн ииппит үлэбит итинник ситиһиилэниэ диэн биһиги санаабатахпыт даҕаны. Кэрэни кэрэхсээн, суолталааҕы болҕойон, тохтообокко айа-тута олорбуппут. Бу кыайыы биһигини ыраахха кынаттыыр, киэҥ сиргэ сирдиир» дииллэр эдэр артыыстар. Кинилэргэ салгыы да ситиһиини баҕарыаҕыҥ.
Бэйэ кэр.