Дьоллоох оҕо саас биһиги олохпутугар биирдэ бэриллэр, кылгас да буоллар алыптаах, дьиктилээх, көрдөөх-нардаах, умнуллубат, саамай чаҕылхай кэрэ кэм буолар. А.И Софронов «Оҕо-оҕо эрдэххэ оонньоомохтоон хаалыаҕыҥ!» диэн хоһуйбута бэрт даҕаны!
Ыам ыйын 13 күнүгэр Лөгөйдөөҕү лицей-интэринээккэ алын сүһүөх кылаастар оҕолоро уонна учууталлара, о.э «Исток» методхолбоһук: 1-кы кылаас салайааччыта Н.С Олесова, 2-с кылаас салайааччыта А.Г Кычкина, 3-с кылаас салайааччыта Л.И Карманова, 4-с кылаас уонна методхолбоһук салайааччыта В.Г. Нафанаилова аан маҥнайгытын «Оһуордаах оҕо саас» диэн кэнсиэри тэрийэн бөһүөлэк олохтоохторугар бэлэх ууннулар.
Кэнсиэри М.Ф. Попова иилээн-саҕалаан ыытта, үҥкүүлэри О.Н. Перевалова, уус-уран ааҕыылары З.П. Лугинова, ырыалары А.Р. Харитонова, муодалары А.Г. Кычкина уонна спортивнай, тэтимнээх үҥкүүнү М.Г. Аммосова туруордулар. Ити курдук хас биирдии кылаас күүс-көмө, биир сомоҕо буолан, бу саҥа бырайыак нэһилиэнньэҕэ сүрэхтэннэ.
Кэнсиэргэ киирбит харчыттан Лөгөй нэһилиэгэр Кэптэнигэ биир дойдулаахпыт Н.П. Бурнашев-Боодьоҕос төрөөбүтэ 125 сылынан тэриллэр улуус таһымнаах үбүлүөйдээх олоҥхо ыһыаҕар бэлэх ууммуттара үтүө дьыала, онон улахан тэрээһиҥҥэ бастакы көмөнү лицей алын сүһүөҕүн кылаастара оҥордулар.
Түмүккэ үөрэх чааһыгар дириэктэри солбуйааччы М.В. Петрова «Исток» методическай бөлөххө махтал суругу, Зинаида Лугиноваҕа Олоҥхо өрөспүүбүлүкэтээҕи кииниттэн махтал сурук кэлбитин үөрүүлээх быһыыга-майгыга туттарда уонна бүтүн оскуола аатыттан махтанан кэнсиэр көрдөрбүт оҕолорбутугар минньигэс ас, утах бэлэх уунна. Маны тэҥэ «Исток» бөлөх күүс-көмө буолбут төрөппүттэргэ улахан-улахан махталын үрдүк сыанаттан биллэрдэ. «Оһуордаах оҕо саас» диэн бырайыак сылтан сыл тэриллэ, үүнэ-сайда тур!
Янис Сысолятин, SiTiM LegMedia киин юнкора