Бүгүн Улуу Кыайыы 80 сылын тэрээһиннэрин сүрүннүүр улуустааҕы хамыыһыйа быйылгы Кыайыы күнүн бэлиэтээһин туһунан киэҥ ыҥырыылаах мунньаҕа буолла. Манна улуус баһылыгын солбуйааччы Анатолий Сторожев, улуустааҕы бэтэрээннэр Сэбиэттэрин бэрэссэдээтэлэ Олег Федоров уонна тэрилтэ салайааччылара кыттыыны ыллылар.
Быйылгы тэрээһин биир уратытынан Кыайыы парадын санатыы буолбакка, “Өспөт тыыннаах полк” сэлэлии хаамыы быһыытынан барыахтааҕын туһунан этилиннэ. Бу Ил Дархан дьаһалынан өрөспүүбүлүкэ үрдүнэн маннык хабааннаахтык ыытыллыахтаах. Оттон “Өспөт тыыннаах полката” дойду үрдүнэн хамсааһын эрэгийиэннээҕи штабын салайааччытынан “Сахабэчээт” САТ генеральнай дириэктэрэ Ньургуйаана Стручкова ананан үлэ саҕаланна.
Бороҕоҥҥо Кыайыы күнүгэр аналлаах тэрээһиннэр ыам ыйын 5 күнүттэн саҕаланыахтара. Манна чугас олорор нэһилиэктэр бэтэрээннэрэ эмиэ кыттыахтара. Тэрээһин Кыайыы мемориаллара баар Хараҕа Төрдүгэр, Хос Үрэххэ, “Батыйа” комплекска ыытыллыахтара. Бу күн улуус дьаһалтатын дьиэтин иннигэр Кыайыы Знамята күөрэйиэҕэ.
Кыайыы үбүлүөйүгэр аналлаах тэрээһин ыам ыйын 8 күнүгэр “Өйдөбүнньүк чүмэчитин” уматыынан салҕаныа. Маны улуус ыччата тэрийэн ыытыа. Ыам ыйын 9 күнүгэр “Өспөт тыыннаах полк” сэлэлии хаамыы Ленин уулуссатынан стадиоҥҥа киириэҕэ (баҕар уларыйыы буолуон сөп).
Норуот күүлэйин сүрүн тэрээһинэ стадиоҥҥа ыытыллыа. Ол курдук Россия Дьоруойа Михаил Стрекаловскай бирииһигэр сыл аайы ыытыллар эстафета, оскуола оҕолорун байыаннай хаамыылара, СӨ норуодунай артыыһа Владимир Заболоцкай кэнсиэрэ буолуохтара. Бырааһынньык биир сонун көстүүтүнэн оҕолор улахан хордара ыллыаҕа. Манна барыта 1400 оҕо хабыллара былааннанар. Бу күн улуус бары нэһилиэктэригэр эмиэ үөрүүлээх тэрээһиннэр ыытыллыахтара.
Афанасий Сектяев