Атырдьах ыйын 7 күнүгэр улуустааҕы социальнай кэлим киин стационарнай отделениетын бырааһынньыктыы киэргэммит тэлгэһэтигэр «Кустук» оҕо сайыҥҥы былаһааккатын түмүктүүр 3-с сезонун үөрүүлээх аһыллыыта буолан ааста.
Сезон үлэтин сүрүн хайысхата – ийэ тылы харыстааһын, сахалыы саҥаны сайыннарыы. Тэрээһини иитээччи Татьяна Свинобоева кыайа-хото тутан сэргэхтик ыытта. Стационарнай отделение сэбиэдиссэйэ Светлана Бурцева тэрилтэ аатыттан былаһаакка үлэтэ саҥардыы эрчиминэн үһүстээн саҕаламмытынан истиҥник эҕэрдэлээтэ, тэрээһин бары кыттыылаахтарыгар махтанна уонна ураты хайысхалаах үлэттэн үгүс үтүө үлэ күүтүллэрин бэлиэтээн эттэ.
Бу дьоро күҥҥэ социальнай партнердар кыттыыны ылбыттара олус хайҕаллаах. Ол курдук улуустааҕы опека уонна попечительство отделыттан сүрүннүүр специалист Варвара Тимофеева уонна Бороҕоннооҕу баһаарынай чаастан инструктор Иван Егоров үлэлэриттэн быыс булан кэлэн оҕо туһугар кыһамньыларын көрдөрдүлэр, оҕолору истиҥник эҕэрдэлээтилэр уонна үөрэх дьыла чугаһаабытынан бэйэлэрин бэлэхтэрин туттардылар. Онтон улуустааҕы «Кэскил түһэ» ийэ тыл түмсүүтүттэн педагогическай үлэ бэтэрээнэ Татьяна Алексеева оҕолорго төрөөбүт тылы таптыырга, харыстыырга анаан кэс тылын тиэртэ. Кини олоҕун устата саха тылын учууталынан үлэлээбит буолан этэр тыла оҕоҕо тиийимтиэ, итиэннэ сүрдээх дириҥ суолталаах буолла.
Ыалдьыттар тэрилтэ иһинэн тэриллибит «Арчылаана» фольклорнай бөлөх оҕолоро (сал. Татьяна Свинобоева) күпсүүргэ оонньообуттарын олус сэргээтилэр. Оҕолорго бэйэлэрин саастыылаахтара Илья Румянцев, Рома Попов, Эрхан Готовцев, Эрхан Горохов ылбаҕай ырыаларын, Люда Попова имигэс хамсаныылаах индийскэй үҥкүүтүн, Александра Антонова, Алика Кулаковская, Эрхан Горохов, Ньургун Гуляев, Эрчим Гоголев, Эрхан уонна Эрсан Готовцевтар сахалыы хоһооннору ааҕан анаабыттара истэ олордоххо наһаа үчүгэй!
Өссө түмүккэ аныгылыы флешмоб үҥкүүлэннэ, күргүөмүнэн ырыа дьиэрэйдэ уонна оһуохай дуорайда. Оһуохайы кылыһахтаах куоластаах кыргыттар Люда Попова уонна Сулусчаана Горохова таһаарбыттарын оҕолор ньиргиччи хатылаан иһиилэрэ оһуохайдыыр үөрүйэх баарын кэрэһэлээтэ. Түмүккэ бу сезон салайааччыта, социальнай педагог Лиана Иннокентьева былаһаакка үлэтин туһунан сырдатта, үлэ былаанын билиһиннэрдэ, иитиллээччилэригэр ситиһиини баҕарда. Оҕолор бу дьоро күн сыдьаайыттан сирэйдиин-харахтыын сырдаатылар, үөрдүлэр-көттүлэр, олус астынан тарҕастылар.
Светлана Бурцева, уопсас .кэрэсп.