Бэҕэһээ биһиги интэринээппитигэр чахчы даҕаны умнуллубат бэлиэ күн буолан ааста. Уус алданнар биир дойдулаахпыт, эдэр, кэскиллээх урбаанньыт Евгений Кривошапкин, Уус Алдан улууһун баһылыгын социальнай боппуруостарга солбуйааччы Анатолий Сторожев, Курбуһах нэһилиэгин баһылыга Владимир Петров, Курбуһахтааҕы ДьУоКХ учаастагын, «Ытык сүбэ» салайааччыта Семен Протопопов, эдэр ырыаһыт Аман Арханов ыалдьыттаатылар.
Урбаанньыт Евгений Кривошапкин музыкальнай аппаратураны бэлэх туттаран үөрүүбүт муҥура суох буолла. Араас тэрээһиннэрбитигэр микрофона суох буолан, үгүс кырдьаҕаспыт кыайан истибэт түгэнэ элбэх буолара. Ааспыт күһүн Евгений Дмитриевич эстрада чулуу ырыаһыттарын Лэкиэһи, Байбал Сэмэнэби илдьэ кэлэн кырдьаҕастарбытыгар олус үчүгэй кэнсиэри бэлэхтээбиттэрэ уонна музыкальнай аппаратурабыт суоҕун бэлиэтии көрөн бэлэх оҥорон аҕалбыта олус долгутуулаах, үөрүүлээх буолла.
Саҥа аппаратураны улууспут киэн туттар эдэр ырыаһыта Аман Арханов туруоран биэрдэ, чуор куолаһынан олус сэргэх ырыалары толорбутун ытыс тыаһынан доҕуһуоллуу көрүстүбүт.
Кэлэн иһэр Аҕа дойдуну көмүскээччилэр күннэринэн улуус баһылыга Василий Аммосов интэриниээппит хас биирдии эр киһи олохтооҕор истиҥ ис хоһоонноох эҕэрдэ суругун уонна бэлэҕин, интэринээт үлэһит эр дьонугар эҕэрдэ суругун Анатолий Дмитриевич туттарда. Кырдьаҕастарбыт улуус баһылыгыттан бэлэх тутан долгуйуулара, үөрүүлэрэ баһаам.
Ыалдьыттарбыт кырдьаҕастарбытын кытары ирэ-хоро кэпсэттилэр, ыйытыыларга эппиэттээтилэр, интэринээппит айар куттаах олохтооҕо Мария Данилова эдэр ырыаһыкка анаабыт хоһоонун туттарда, олус истиҥ көрсүһүү буолла. Мария Данилова күһүн Евгений Дмитриевичка анаабыт хоһоонун бэрт кичэллээхтик илдьэ сылдьарын үөрэ иһиттибит.
«Илии тутуурдаах, өттүк харалаах» кэлэн барбыт үтүө санаалаах дьоммутугар дириҥ махталбытын, убаастабылбытын биллэрэбит, дьон-норуот олоҕо тупсарын, дойдубут сайдарын туһугар түбүгүрэр үлэҕит өссө тахсыылаах буоллун, күн сирин бары үтүөтүн, кытаанах доруобуйаны, улахан дьолу баҕарабыт! Үтүө санааҕыт сүүс төгүл үтүөнэн эргийдин!
Мария Винокурова