Мүрү 1 нүөмэрдээх орто оскуолатыгар алын сүһүөх кылаастар Саҥа дьыллааҕы утренниктара ахсынньы 25 күнүгэр ыытыллыбыта. Бырааһынньык кэмигэр ахсынньы 31 күнүгэр күн сирин көрбүт оҕолору, кинилэр ийэлэрин көрсөн кэпсэтэн ыллым. Үөрүүнү бэлэхтээбит кимнээх эбиттэрий? Билсиэҕиҥ.
Аделина Охлопкова, 3 «б» кылаас туйгун үөрэнээччитэ, ийэтэ Лия Дмитриевна Охлопкова, «Өркөн» оҕону эбии үөрэхтээһин киинин мэтэдьииһэ:
– Аделина иккис оҕом. Кини Бороҕоҥҥо 2015 сыл ахсынньы 31 күнүгэр сарсыарда 10 чааска төрөөбүтэ. Аделина ортоку оҕо, эдьиийдээх уонна бырааттаах. Үөрэҕэр кыһаллар. Оҕо спортивнай оскуолатын иһинэн «Энергия» үҥкүү куруһуогар үһүс сылын дьарыктанар. Маны тэҥэ видео устуунан үлүһүйэр. Аделина төрөөбүт күнүн ахсынньы 31 күнүгэр сарсыарда 10 чааска дьиэ иһигэр ылааччыбыт. Онон биир күн биһиги иккитэ бырааһынньыктыыбыт.
Дьулуур Кырбасов, 2 «б» кылаас туйгун үөрэнээччитэ, ийэтэ Устьяна Егоровна Аргунова , улуустааҕы киин балыыһа оҕо отделениетын үлэһитэ:
– Биһиги дьиэ кэргэн 4 оҕолоохпут. Дьулуур кырабыт. 2015 сыл ахсынньы 31 күнүгэр сарсыарда 6 аҥары ааһыыта күн сирин көрбүтэ. Дьулуур – биһиги эрэлбит. Сыл аайы ахсынньы 31 күнүгэр киэһэ 4 чаастан аттынааҕы ыалларбыт оҕолорун кытта Дьулуур төрөөбүт күнүн бэлиэтиибит. Киэһэ 9 чаастан Саҥа дьыл бырааһынньыга саҕаланар. Утренникка Дьулуур маскарааттарга 1-кы миэстэни ылан үөрэн турабыт. Маскараатын бэйэм оҥорбутум. Быйылгы сыл өссө биир ситиһиинэн түмүктэнэн эрэриттэн сэмэйдик үөрэбин.
Аммосова Дарина, 4 «б» кылаас туйгун үөрэнээччитэ, ийэтэ Аммосова Марина Виссарионовна, тыа хаһаайыстыбатын управлениетын дьыалаҕа уонна каадырга специалиһа:
– Биһиги алта кыыс оҕолоох ыалбыт. Аҕабыт Юрий Дмитриевич казначейство салаатын начаалынньыга. Дарина төрдүс оҕобут, 2014 сыл ахсынньы 31 күнэ үүнэр түүнүгэр Бороҕоҥҥо төрөөбүтэ. Балыстарын көрсөр туһа киһитэ. Иллэҥ кэмигэр кинигэ ааҕарын, уруһуйдуурун сөбүлүүр. 2-с кылаастан ыла үһүс сылын Бороҕоннооҕу оҕо искусствотын оскуолатыгар художественнай кылааска дьарыктанар. Быйыл анималистика искусствотын норуоттар икки ардыларынааҕы куонкуруһугар «Тыа ыраахтааҕыта» үлэтинэн 2-с миэстэни ылан, кыайыылаах дипломунан бэлиэтэммитэ. Дарина төрөөбүт күнүн 31 чыыһылаҕа 4 чаастан саҕалаан бэлиэтиир үгэстээхпит. Оҕолору тохсунньу 1 күнүгэр ыҥырааччыбыт.
Билсибиккит курдук үс оҕо үһүөн үөрэх туйгуннара. Аделинаҕа, Дьулуурга, Даринаҕа Саҥа дьыл, кэлэр сыл үөрүүнү бэлэхтээтин.
Елена Сыроватская, уопсас. кэрэсп.