Нэһилиэктэр бэтэрээннэрин Сэбиэттэрин икки ардыларыгар ыытыллар уус-уран самодеятельноһы көрүүгэ “Кэхтибэт талааннар” бэстибээл алтынньы 20 күнүгэр Бээрийэ бөһүөлэгэр буолла. Манна 3-с бөлөххө киирбит Түүлээх, 2-с Байаҕантай уонна Бээрийэ нэһилиэктэрэ кытыннылар.
Бээрийэҕэ үс нэһилиэктэн барыта 35 аҕам саастаах олоххо көхтөөх дьоммут бэстибээл тэрээһиннэригэр кыттыстылар. Кэнсиэри культура дьиэлэрин уус-уран салайааччылара Түүлээхтэн Мария Винокурова, Тиит Арыыттан Сардаана Турантаева, Бээрийэттэн Ольга Томская бииртэн-биир дьоннорун сыанаҕа ыҥыран таһааран, кэнсиэр үрдүк таһымҥа ааһарыгар төһүү буоллулар.
Бу көрүүгэ Түүлээх нэһилиэгиттэн Илья Румянцев, “Дэйбиирдээх үңкүүнү” толорбут үңкүү бөлөҕө, Бээрийэ нэһилиэгиттэн “Доҕорбор” ырыаны толорбут трио, 2-с Байаҕантай нэһилиэгиттэн уус-уран ааҕыыга Анатолий Старостин-Сиэн Кынат “Санаайыктар, суруктар” айымньытыттан ааҕан Агафия Турантаева-Бысыина лауреаттарынан ааттаннылар. Оттон Түүлээх нэһилиэгиттэн Зинаида Бочкарева (уус-уран ааҕыы), ансаамбыл, 2-с Байаҕантай нэһилиэгиттэн Евдокия Саввина (соло), ансаамбыл, Бээрийэ нэһилиэгиттэн Егор Васильев (соло), “Алгыс” үңкүү бөлөҕө, уус-уран ааҕыыга Анастасия, Илья Васильевтар, ансаамбыл дипломант буоллулар.
Уопсай көрүү түмүгүнэн 2-с Байаҕантай нэһилиэгэ – 4,55, Бээрийэ нэһилиэгэ – 4,56, Түүлээх нэһилиэгэ 4,58 бааллары ыллылар.
Бэстибээл саамай аҕа кыттааччытынан Саха АССР тыатын хаһаайыстыбатын үтүөлээх үлэһитэ 85 саастаах Егор Ильич Васильев буолла. Кини бу көрүүгэ Виталий Андросов “Маҥнайгы хаар” ырыатын толорон дипломант аатын сүктэ. Кинини кытта төрөппүт уола – Бээрийэ нэһилиэгин баһылыгынан үлэлээбит Илья Егорович Васильев дьиэ кэргэнинээн кыттыбыттарын биһирии, кэрэхсии, астына көрдүбүт.
Бу күн биир көлүөнэ дьон көрсөн итии чэйдээх остуол тула олорон сэлэһэн, эдэр саастарын санаан астына үңкүүлээн, Бээрийэ кулуубун үлэһиттэригэр истиң, сылаас көрсүһүүлэригэр махтанан тарҕастылар.
Кэлэр көрүү алтынньы 23 күнүгэр Дүпсүн бөһүөлэгэр буолуоҕа. Манна 1-кы бөлөххө кыттар улахан нэһилиэктэр – Мүрү, Лөгөй, Найахы, Дүпсүн, 1-кы Хоро кыттыахтара.
Анна Лугинова, культура улуустааҕы управлениетын кылаабынай специалиһа, дьүүллүүр сүбэ бэрэссэдээтэлэ