Мүрү, 1-кы Хоро, Лөгөй, Найахы нэһилиэктэрэ алтынньы 23 күнүгэр, бэтэрээннэр бэстибээллэригэр Дүпсүн сиригэр көрүстүлэр.
Бэстибээл кыттыылаахтарын Николай Егорович Корнилов аатынан сынньалаҥ киинигэр киирээти кытта нэһилиэк ыччата сахалыы таҥнан, арыылаах алаадьынан айах тутан уруйдуу-айхаллыы көрүстэ.
Бэтэрээннэр улуустааҕы Сэбиэттэрин бэрэссэдээтэлэ Иван Колодезников бэстибээл кыттыылаахтарыгар эҕэрдэтин тиэртэ, бэтэрээннэр Сэбиэттэрэ ыытар үлэлэрин туһунан билиһиннэрдэ, актыыбынай аҕа көлүөнэ дьоҥҥо махталын биллэрэн туран кыттыылаахтарга ситиһиини баҕарда.
Тэрээһин кыттыылаахтара бу соторутааҕыта 91 сааһыгар олохтон барбыт Дүпсүн нэһилиэгин ытыктанар кырдьаҕаһа, Саха АССР үтүөлээх зоотехнига, РСФСР т/х туйгуна, улуус уонна Дүпсүн нэһилиэгин бочуоттаах олохтооҕо, уус-уран самодеятельность актыыбынай кыттыылааҕа Татьяна Константиновна Сивцева сырдык аатыгар тохтобул биллэрэн чуумпуран ыллыбыт.
Онтон Дүпсүн нэһилиэгин дьаһалтатын специалиһа Майя Прибылых кэлбит нэһилиэктэргэ Дүпсүн нэһилиэгин баһылыгын аатыттан эҕэрдэ суруктары, өйдөбүнньүк бэлэхтэри туттарда.
Кэнсиэр Дүпсүн ыччатын эҕэрдэ үҥкүүтүнэн саҕаланна. Бу үҥкүүнү аҕам саастаах дьоммутугар ытыктабыл, сүгүрүйүү бэлиэтин курдук ылынан, бэстибээл кыттыылаахтара дохсун ытыс тыаһынан махталларын биллэрдилэр.
Ыытааччылар Дүпсүнтэн Тамара Михайлова, Лөгөйтөн Марианна Попова, Мүрүттэн Мария Петухова, Найахыттан Светлана Петрова, Чараҥтан Екатерина Свинобоева бэйэлэрин нэһилиэктэрин ылбаҕай, истиҥ тылларынан хоһуйан, көрөөччүлэри эҕэрдэлиир иһирэх тылларынан көрүү бэстибээлбит саҕаланна.
“Улахан иһит салааһыннаах” диэн өбүгэлэрбит хоһуйан этэн хаалларбыттарын курдук, улахан нэһилиэктэр үгүс талааннаах дьонноруттан талыллан кэлбит бииртэн-биир бастыҥ нүөмэрдэр солбуйсан 3 чаастаах кэнсиэрбит биллибэккэ ааста. Биэс нэһилиэктэн олоххо көхтөөх аҕам саастаах көлүөнэ дьонтон барыта 134 киһи кытынна.
Дьэ уонна түмүккэ бастыҥнар ааттаннылар.
Лауреаттар:
- Дүпсүн далбар хотуттара, үңкүүһүттэр бөлөхтөрө;
- Найахыттан Федор Петров, уус-уран ааҕыыга “Кэрэхсээ” бөлөх, дьахталлар ансаамбыллара;
- Лөгөйтөн Егор Лугинов, уус-уран ааҕыыга Ульяна Бурнашева;
- Мүрүттэн холбоһуктаах ансаамбыл, “Чараҥҥа” ырыанан квартет;
- 1-кы Хороттон “Алааһым арылы кустуга” ырыанан квартет.
Дипломаннар:
- Мүрүттэн Василий Охлопков, “Үчүгэйиэн Мүрүбэр” үңкүүнэн “Күндүүнэ” бөлөх;
- 1-кы Хороттон Николай Бурцев, “Охсуллубут от” кинигэттэн уус-уран ааҕыы;
- Дүпсүнтэн Светлана Алексеева;
- Лөгөйтөн “Сомоҕолоһуу” үҥкүү, “Айылгы” вокальнай ансаамбыл;
- Найахыттан “Күбэйэ” үҥкүү бөлөҕө, “Уочаракка” сыанка.
Толоруу маастарыстыбата, маассабас, көстүүм сыаналанан:
- Дүпсүн – 4,81 баал
- 1-кы Хоро – 4,82 баал
- Мүрү – 4,87 баал
- Лөгөй – 4,90 баал
- Найахы – 4,91 баал
Түгэнинэн туһанан, алтынньы 19 күнүгэр 75 сааһын туолбут, уус-уран самодеятельность актыыбынай кыттыылааҕа, сыана бэтэрээнэ, кэхтибэт талаан Федор Дмитриевич Петровка улуус култуураҕа управлениетын, улуус мелодистарын түмсүүтүн аатыттан эҕэрдэ сурукпутун туттардыбыт.
Дүпсүн сирин дьоно ыалдьыттарын олус тэринэн көрүстүлэр, бары усулуобуйаны барытын тэрийбиттэр. Бүтэһигэр нэһилиэк тэрилтэлэрэ бары кыттыһан тэрийбит фуршеттарын маанылаах остуолугар бэстибээл бары кыттыылаахтарын ыҥыран күндүлээтилэр.
Ырыа-тойук да ылланна, үҥкүү-битии да тэрилиннэ.
Бэстибээл тэрийээччилэрин ааттарыттан маннык истиҥник көрсүбүт Дүпсүн дьонугар, култуура дьиэтин бары үлэһиттэригэр махталбытын тиэрдэбит.
Бастакы бөлөҕү түмүктүүр көрүү алтынньы 28 күнүгэр Тумул бөһүөлэгэр буолуоҕа. Манна Курбуһах, Өлтөх, Суотту, Бороҕон нэһилиэктэрин аҕам саастаахтара түмсэн күөн-көрсүөхтэрэ.
Быйыл улууспутугар биллэриллибит Түмсүү уонна бииргэ үлэлээһин сылыгар маннык тэрээһиннэр тэриллэннэр дьоммут-сэргэбит биир өйгө-санааҕа түмсэн иннибит диэки эрэллээхтик хардыылыаҕын, айыаҕыҥ-тутуоҕуҥ!
Анна Лугинова, дьүүллүүр сүбэ бэрэссэдээтэлэ