Мусуойдар аан дойдутааҕы күннэригэр саха норуотун историятыгар уонна култууратыгар дириҥ суолу-ииһи хаалларбыт уһулуччулаах уопсастыбаннай диэйэтэл, учуонай, суруйааччы уонна суруналыыс Василий Васильевич Никифоров-Күлүмнүүр төрөөбүтэ 160 сылын бэлиэтиибит.
Бу бэлиэ түгэни өрөспүүбүлүкэбит педагогическай уопсастыбата бүттүүн бэлиэтиир. Үбүлүөйдээх сыл чэрчитинэн «Оҕо саас сирдьиттэрэ (Навигаторы детства)» иккис сылын «Саха ыалын олоҕо (Семейный быт якутов)» диэн оскуола мусуойдарын экскурсоводтарын региональнай күрэстэрин ыыталлар. Күрэс түмүгэ ыам ыйын 21 күнүгэр биллиэҕэ.
Күрэс аата Василий Васильевич улахан этнографическай үлэтиттэн төрүттээх: кини 1894–1897 сылларга Сибиряков экспедициятыгар кыттыһан, «Саха ыалын олоҕо» диэн фундаментальнай чинчийиини оҥорбута.
Күрэскэ үлэлэри тутуу түмүктэннэ. Күрэххэ 6-тан 18-гар диэри саастаахтар кытыннылар. 10 улуустан уонна оройуонтан 41 үлэ киирдэ: Амма, Үөһээ Бүлүү, Бүлүү, Мэҥэ Хаҥалас, Нерюнгри, Сунтаар, Таатта, Хаҥалас, Чурапчы уонна Уус Алдан.
Кыттыы усулуобуйалара:
- XX үйэ иннинэ оҥоһуллубут биир мусуой экспонататыгар анаммыт видеоролик бэлэмнээһин;
- ролигы социальнай ситимнэргэ таһаарыы;
- үлэни сахалыы эбэтэр нууччалыы тылынан устуу.
Дьүүллүүр сүбэ састааба: Атласова Е.В. — И.Н. Жирков аатынан Дүпсүн орто оскуолатын библиотекара, Бурцева Д.Н. — Кулантай аатынан литэрэтиирэ мусуойун сэбиэдиссэйэ; Бурцева Т.Д. — С.С. Васильев-Борогонскай аатынан Кииннэммит улуустааҕы библиотека библиотекара; Стрекаловская Т.П. — Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатын Бороҕоннооҕу филиалын методист-инструктора; Федорова С.А. — В.В. Никифоров-Күлүмнүүр аатынан Дүпсүннээҕи технопарк методиһа; Ябловская Х.П. — И.Н. Жирков аатынан Дүпсүн орто оскуолатын төрөөбүт тыл уонна литэрэтиирэтин учуутала.
Василий Васильевич Никифоров-Күлүмнүүр саха култууратыгар, историятыгар уонна саха норуотун өйүгэр-санаатыгар ураты миэстэни ылар. Кини 1900–1920 сс. уларыта тутуу кэмнэригэр норуот олоҕор киллэрбит саҥалыы көрүүлэрин уонна уларытыыларын өйдүүр улахан суолталаах.
Биһиги сүрүн сорукпут — эдэр көлүөнэҕэ биир дойдулаахпытын, кини норуот сайдыытыгар киллэрбит сүдү кылаатын туһунан билиини-көрүүнү тиэрдии, салгыы чинчийии.
Мария Винокурова, «Оҕо саас сирдьиттэрэ (Навигаторы детства)» улуустааҕы координатора