В.В. Алексеев аатынан Мүрүтээҕи уолаттар гимназияларын 10-с кылааһын үөрэнээччилэрэ экстрим-походка баран кэллибит.
Муус устар 28-30 күннэригэр В.В. Алексеев аатынан Мүрүтээҕи уолаттар гимназияларын “Кыһыл көмүс фондатыгар” киирэр үгэс буолбут үс күннээх экстрим-походка кылааһынан 17 уол буолан баран кэллибит. Бу экстрим-походка сырыыбыт саха норуотун инники дьылҕатын, сайдыытын туһугар өйүн-санаатын, олоҕун анаабыт, дириҥ өйдөөх-санаалаах сүдү киһибит Василий Васильевич Никифоров-Күлүмнүүр төрөөбүтэ 160 сылыгар анаан Нэрэлики алааска тиийэ хаамтыбыт. Биһигини гимназиябыт директора Валерий Рожин, иитэр үлэҕэ дириэктэри солбуйааччы Уолан Колодезников уонна учууталларбыт Руслан Жирков, Иннокентий Жирков салайан илдьэ сырыттылар. Бороҕон – Тулуна – Эһэлээх – Остуойка – Дүпсүн – Нэрэлики маршрутунан 70 км сатыы сылдьан кэллибит.
Бастакы күммүтүгэр гимназияттан саҕалаан сатыы хааман Тулунаны ааһан Өнөр нэһилиэгэр тиийбиппит. Суол кууран, трасса устун бэрт сэниэлээхтик, түргэнник хааман кэлбиппит. Тута тиийэн түмэлгэ сылдьыбыппыт, онно биһиэхэ Арассыыйа Дьоруойа Михаил Михайлович Стрекаловскай туһунан сиһилии кэпсээбиттэрэ. Салгыы оскуола оҕолорун кытта билсэн, киэһэбитин бэрт сэргэхтик атаарбыппыт.
Иккис күммүтүгэр сарсыарда ойон тураат суунан-тараанан, 8 чааска Дүпсүҥҥэ сатыы туруммуппут. Дүпсүн бэрт тэйиччи буолан, алаастарынан, тыа быыһынан быһалыы хаампыппыт. Суолбут уулаах-хаардаах буолан, айаммыт биллэрдик бытаарбыта. Бу сылдьан араас көтөрдөрү, кыыллар суолларын көрбүппүт. Тыллан эрэр айылҕа чэбдик салгыныгар хаамар олус үчүгэй этэ. Дүпсүҥҥэ аҕыс чаас кэриҥэ хааман тиийбиппит. Тиийээт да В.В. Никифоров-Күлүмнүүр аатынан технопаркаҕа сылдьыбыппыт. Космонавтика түмэлигэр макетнай ракетаны көтүтэн көрдөрбүттэрэ, ону таһынан Күлүмнүүр туһунан кэпсээбиттэрэ. Күлүмнүүр олорон ааспыт дьиэтин-уотун көрбүппүт. Киэһэҥҥи өттүгэр оскуола оҕолорун кытта оонньоон бириэмэбит эмиэ биллибэккэ ааспыта.
Үһүс күммүтүгэр туруоруммут сыалбытыгар – Дүпсүнтэн эмиэ тэйиччи турар Күлүмнүүр алааһыгар Нэрэликигэ – тиийбиппит. Бу күн нэһилиэк олохтоохторо субуотунньукка тахсыбыт этилэр. Онон Күлүмнүүр тэлгэһэтин саҥардыыга баҕана уонна сиэрдийэ маһын бэлэмнииргэ көмөлөстүбүт. Барыта 90-ча баҕана бэлэмнэннэ. Бу күн сүдү киһи төрөөбүт төрүт түөлбэтигэр төрөөбүтэ 160 сылыгар анаабыт хоһооммутун аахпыппыт.
Бу маннык тэрээһин уол оҕо айылҕаны кытта алтыһарыгар, атын дьону-сэргэни кытта билсэригэр, улууспут нэһилиэктэрин историятын билэригэр, бэйэтин тургутан көрөрүгэр олус туһалаах эбит дии санаатыбыт. Хас биирдии сиргэ-уокка тохтоон ааһан, сынньанан ылбыппыт. Биһиги бу сырыыбытыгар олус элбэҕи биллибит-көрдүбүт. Хас биирдии сылдьыбыт бөһүөлэкпит ураты историялааҕы сэргээтибит.
«Уолан» гимназиябыт умнуллубат түгэни бэлэхтээбитигэр уонна нэһилиэк олохтоохторугар, үлэһиттэригэр, оҕолорго улахан махталбытын тиэрдэбит. Экстрим-походка туруоруммут сыалбытын-сорукпутун толору ситэн, үтүө дьыалаҕа кыттыһан кэлбиппитинэн киэн туттабыт!
Сайаан Бурнашев, 10 кылаас гимназиһа