Лөгөйдөөҕү лиссиэй-интэринээккэ Саас уонна Үлэ бырааһынньыгын уруйдуу көрсөр үгэскэ кубулуйбут «Күөх Маай үҥкүүлүүр» бэстибээл бэҕэһээ, муус устар 29 күнүгэр, ыытылынна.
Быйылгы күрэс Россияҕа Норуоттар сомоҕолоһууларын, Саха сиригэр Култуура сылларыгар уонна Үҥкүү норуоттар икки ардыларынааҕы күннэригэр ананна, онон хас биирдии кылаас араас норуоттар дьэрэкээн таҥастарын- саптарын симэнэн кэлэннэр тэрээһини олус киэргэттилэр, көрөөччүлэри сөхтөрдүлэр.
Кэнсиэр саҕаланыытыгар Үҥкүү күнүнэн хас биирдии кылаастан иккилии оҕо параадтаан киирдэ, дойдубут Өрөгөй ырыата дуорайда. Онтон 5-с кылаас үөрэнээччитэ Вика Готовцева ыллам ырыатын бэлэхтээтэ.
Бэстибээлбит оҕо кэрэни кэрэхсииригэр, үҥкүү кэрэ култууратын билэригэр, кылаас оҕолоро бары бииргэ түмсэллэригэр үөрэтэр. Дьүүллүүр сүбэҕэ Т.М. Петухова, М.Ф. Попова, Е.Д. Петухова коллективтар үҥкүүлэргэ ордук сөпкө уонна тэҥҥэ хамсаналларын, сыанаҕа туттуу-хаптыы култууратын уонна үҥкүү уопсай уруһуйун, ис хоһоонун көрдүлэр.
Итинник сыанабыл түмүгүнэн «Дебют года» анал аат – 1-кы кылаас (кыл. сал. Н.С. Олесова) буолла, онтон «В Единстве – сила!» 5-с кылаас (кыл. сал. Е.М. Старкова) буолла; «Счастье в дружбе» – 10-с «б» кылаас (кыл. сал. А.А. Бережнев). «Приз зрительских симпатий» – 8-с кылаас (кыл. сал. А.М. Колесова А.М.) Марианна, Куприян Поповтар дьиэ кэргэннэриттэн анал минньигэс бириис (торт) туттулар. Дипломаннар: 3-с ст. – 9 «б» кылаас (кыл. сал. М.Г. Аммосова), 2-с ст. – 4-с кылаас (кыл. сал. В.Г. Нафанаилова), 1-кы ст. – 7-с кылаас (кыл. сал. А.М. Сысолятина). Лауреата: 1-кы ст. – 10 «а» кылаас (кыл. сал. Н.Е. Бурнашева), 2-с ст. – 3-с кылаас (кыл. сал. А.Г. Кычкина), 3-с ст. – 6-с кылаас (кыл. сал. А.Е. Копырина), лауреат лауреатов – 9 «а» кылаас (кыл. сал. А.А. Пахомова). Оттон үҥкүү бэстибээлин ГРАН-ПРИ хаһаайыттарынан 8-с кылаас коллектива (кыл. сал. А.М. Колесова) буолары ситистилэр. Итини таһынан үҥкүү бырааһынньыгын түмүгэр хас биирдии кыттыбыт кылаас оҕолоро минньигэс сэмэй бэлэх тутан астынан тарҕастылар.
Бу Үҥкүү күнүн бэстибээлин хас биирдии түгэнэ барыбытыгар норуоттар доҕордоһууларын бэлиэтээн саҥа култууралары уонна сонун ырыаны-үҥкүүнү билиһиннэрдэ. Куруук бука бары эйэлээх халлаан анныгар олоруоҕуҥ!
Янис СЫСОЛЯТИН, SiTiM LegMedia юнкора. Кэптэни
Reels видеоны Сааскылана Малышева оҥордо