Бүгүн оскуола үөрэнээччилэрин ортолоругар академик В.П. Ларионов аатынан XXVIII «Инникигэ хардыы» научнай-практическай конференция саҕаланна. Үс күн устата «Триумф» СК уораҕайыгар Сахабыт сирин бары муннуктарыттан сүүмэрдэммит 1800 оҕо кыттан үлэлэрин көмүскүөхтэрэ.
Улууспутуттан барыта 50 үөрэнээччи кыттар. Элбэх кыттааччылаах оскуолаларынан Лөгөй, Дүпсүн орто оскуолата уонна Мүрүтээҕи уолаттар гимназияларын бэлиэтиибит.
Оҕолорбут араас хайысхаҕа күн бүгүҥҥүттэн кыттан сылы сыллаан үлэлэспит бырайыактарын көмүскүүллэр. Олор истэригэр ахсааҥҥа дьарыктыыр төлөпүөн сыһыарыыта, компьютерга олоҥхо тиэмэтигэр оонньууну оҥоруу, хомус тылын быһар станок, тыа баһаарын кэтээн көрөр тэрил, тымныыны тулуйар смартфоннар хахтара, мас тардыһыы ньыматын баһылыырга бэйэ оҥоһук тренажер, илин эҥэр улууска үүнэр хортуоппуй суортара, олоҥхолорго өҥ туттуллуута курдук араас интэриэһинэй бырайыактар бааллар.
Оҕолорбутугар ситиһиини баҕарыаххайыҥ!
Мария Аргунова