Айсен Николаев Уус Алдаҥҥа сырыытын “Хаарбах дьиэттэн көһөрүү” бырагырааманан тутулла турар элбэх кыбартыыралаах дьиэ тутуутуттан саҕалаата.
Манна Уус Алдан улууһун дьаһалтатын тутууга уонна архитектураҕа управлениетын салайааччыта Максим Гуляев үлэ хайдах бара турарын иһитиннэрдэ, 58 кыбартыыралаах дьиэ былааны ситэн иһэрин эттэ, кэлэр сыл хайаан да киирэрин мэктиэлээтэ.
Кэпсэтии кэмигэр үлэни толорооччу сүрүн бэдэрээччит Арсен Ермолаев хайдах дьаһанан үлэлии сылдьалларын кэпсээтэ. Айсен Сергеевич тутулла турар дьиэ 1 кв.м. иэнэ төһө суумалаах буоларын ыйыппытыгар, Максим Витальевич: «144 тыһыынча солкуобайга тэҥнэһэр», – диэтэ.
Арсен Наумович: “Тутууга 31 киһи үлэлии сылдьар. Мэндиэмэннэрин таһааран, билигин эркиннэрин шлакоблогунан ууран саҕалаатыбыт. Былааммытын балай да куоһаран иһэбит”, – диэн иһитиннэрдэ.
Анатолий Кириллин