Өнөргө успуорт эйгэтигэр бэриниилээх, анаан дьарык оҥостон нэһилиэгин чиэһин көмүскүүр киһи аҕыйаҕа суох. Бүгүн сырдатар киһим Бүлүү улууһуттан төрүттээх. Кини акушер идэтин баһылаан 34 сыл үтүө суобастаахтык үлэлээбит СӨ доруобуйа харыстабылын туйгуна, доруобуйа харыстабылын министиэристибэтин махтал суругунан, успуорду, физическэй култуураны сайыннарыыга кылаатын иһин СӨ Судаарыстыбаннай Мунньаҕын (Ил Түмэн) бочуотунай грамотатынан бэлиэтэммит “Өнөр нэһилиэгин социальнай-экономическай сайдыытыгар кылаатын иһин” бэлиэ хаһаайката, успуорт уонна үлэ бэтэрээнэ, мааны кийиит, үс оҕо күн-күбэй ийэтэ, үс сиэн амарах эбэтэ Александра Ушницкая буолар.
Александра Егоровна Бүлүү оройуонугар Хаҕын нэһилиэгэр 1960 сыллаахха Варвара Никитична, Егор Алексеевич Афанасьевтар дьиэ кэргэннэригэр алтыс оҕонон төрөөбүт, оҕо сааһа, оскуолатааҕы кэмнэрэ Балаҕаччыга ааспыттар. Аҕата бэйэтин кэмигэр сүрдээх кыанар тимир ууһунан, оһохчутунан биллибит киһи эбит. Ийэтэ атаҕынан быһый үһү, кылгас дистанцияҕа нэһилиэгин чиэһин элбэхтик көмүскээбит. Оҕолор бары ийэлэрин батаннар, успуорт эйгэтигэр уһаарыллан улааппыттар. Шура кыыс аан бастаан Балаҕаччыга 8-с кылааска үөрэнэ сылдьан дуобат күрэхтэһиитигэр 1-кы миэстэни ылан үөрбүтүн-көппүтүн умнубат, ону таһынан куруук хайыһардыыр, 100 м сүүрэр эбит, волейболга даҕаны оскуолатын чиэһин элбэхтик көмүскээбит.
Сытыы-хотуу кыысчаан 1977 сыллаахха Мастаах орто оскуолатын ситиһиилээхтик бүтэрэр. Бастаан дойдутугар участковай балыыһаҕа үлэҕэ киирэн санитаркалаабыт, онтон 1982 сыллаахха баҕалаах үөрэҕэр фельдшер идэтигэр Дьокуускай куоракка туттарса барар. Оччолорго медучилищеҕа фельдшерскэй отделениеҕа миэстэ суох буолан, акушер идэтигэр туттарсан киирэн үөрэнэр уонна 1985 сыллаахха бүтэрэр. Онтон дьэ Уус Алдаҥҥа ананан кэлэр.
Бастакы сылыгар Бороҕоҥҥо роддомҥа үлэҕэ киирэн үлэлии сылдьан Өнөр уолун Дмитрий Ушницкайы көрсөн, дьылҕалара сирдээтэҕэ, Эһэлээх бөһүөлэгэр участковай балыыһаҕа миэстэ тахсан, акушер идэтинэн үлэтин саҕалаабыта. Оччолорго кинини уоппуттаах үлэһит далбар хотуттар Светлана Протопопова, Людмила Павловна көрсүбүттэрэ, күүс-көмө буолбуттара. Ушницкайдар 1986 сыллаахха кыһын бастакынан арыгыта суох сыбаайбаны оҥороллор.
Эдэркээн ыал аатын сүгэн, утуу-субуу үс оҕолоноллор уонна ньир-бааччы олох олорон иһэннэр, аҕалара Дмитрий Ушницкай ыарахан ыарыыттан күн сириттэн күрэммитэ. Александра онтон толлон турбатаҕа, оҕолорун атахтарыгар туруортаабыта. Үлэтиттэн, дьиэтиттэн быыс булан нэһилиэгин олоҕор актыыбынай позициялаах, уопсастыбаннай үлэҕэ куруутун кыттара. 2011 сылтан төрөппүт комитетын бэрэссэдээтэлинэн уонна 2012-2017 сс. нэһилиэк депутатынан талыллан үлэлээбитэ.
Билигин Александра Ушницкая бочуоттаах сынньалаҥҥа олорор. Кини 34 сыл устата сөбүлүүр идэтигэр бэриниилээхтик үлэлээбитэ, кыһамньылаах сымнаҕас илиитин иһинэн төһөлөөх элбэх оҕо төрөөбүтэ буолуой?
Александра Егоровна үлэтин да быыһыгар успуорт эйгэтиттэн тэйбэтэҕэ, нэһилиэккэ күрэхтэһиилэргэ, улууһугар буолар спартакиадаларга куруук кыттара.
Ол туһунан бэйэтэ санаатын маннык үллэстэр:
– Биһиги волейболга кэрэ аҥаардарга маҥнайгы хамаандабыт састааба кийииттэр этибит: Акулина Лукачевская, Анна Афанасьева, Евдокия Лукачевская, Светлана Протопопова, Марианна Сергеева, Снежана Лукачевская оонньууллара, онтон кэнники Сунтаартан кэлбит Мария Попова эбиллибитэ. Маннык састаабынан өр сылларга нэһилиэкпит чиэһин көмүскээбиппит. Билигин бэтэрээннэр күрэхтэһиилэригэр кыттабыт. 2000 сылтан ыаллыы сытар 2-с Лөгөй, 1-кы Өспөх, Өнөр нэһилиэктэрин икки ардыларыгар күрэхтэһии саҕаламмыта уонна билигин даҕаны хабылыкка, хаамыскаҕа, дуобакка, саахымакка, эстафетаҕа күрэхтэһэбит. Ону таһынан көлүөнэлэр көрсүһүүлэрэ, устудьуоннар, ыччат уонна бэтэрээннэр күрэхтэһиилэрэ сылын аайы буолаллар. Мин үксүн теннискэ, волейболга, ытыыга, хабылыкка, хаамыскаҕа, дартска кыттабын, улууһум нэһилиэктэрин барыларын кэрийбитим.
Ити курдук Александра Ушницкая күүрээннээх үлэтин уонна успуорка бэриниилээҕин киһи ааҕан сиппэт грамоталара, нэһилиэгиттэн, улууһуттан, өрөспүүбүлүкэттэн наҕараадалара туоһулууллар. Оҕолоро бары Дьокуускайга олохсуйдулар. Улахан кыыс Варвара Дмитриевна ХИФУ клиникатыгар оториноларинголог бырааһынан, отделение сэбиэдиссэйинэн үлэлиир, кини кэргэнэ Михаил Местников ХИФУ ИМИ үөрэҕин бүтэрэн, “РЦИТ” тэрилтэҕэ инженердыыр. Местниковтар икки оҕолоохтор: Ярик – 4-с, София 3-с кылааска үөрэнэллэр. Афанасий Ушницкай 2-с №-дээх Республикатааҕы балыыһаҕа “Суһал көмө” суоппарынан үлэлиир, кини уола Егорка – 4-с кылаас үөрэнээччитэ. Кыра кыыс Яна – Дьокуускай куорат 27-с №-дээх орто оскуолатыгар алын сүһүөх кылаас учуутала.
Кыргыттар хос эбэлэрин, ийэлэрин утумнаан успуорт эйгэтигэр сыстаҕастар. Варя мас тардыһар, ийэтин курдук волейболлуур, эстафетаҕа сүүрэр. Бороҕоҥҥо үлэлиир кэмигэр Чурапчыга доруобуйа харыстабылын үлэһиттэрин спартакиадаларыгар волейболга, сүүрүүгэ 2-с миэстэни ылары ситиспитэ. Яна оскуолаҕа үөрэнэр кэмиттэн буулдьанан ытыы күрэстэригэр 1-кы, 2-с миэстэлэри ылара. Афанасий уһун дистанцияҕа сүүрэн 2-с миэстэ буолбута.
Бука бары сайын аайы ийэлэригэр, эбэлэригэр кэлэн дуоһуйа сынньанан бараллар. Дойдуларын ыһыаҕар сиэннэр эбэлэрин кытта күрэхтэһиигэ кыттан кыайыы өрөгөйүн билэллэр. Ол курдук сиэнэ Софья бэйэтин саастыылаахтарыгар сүүрүүгэ 1-кы миэстэни ылан үөрбүтэ. Ити курдук Александра Егоровна оҕолорун, сиэннэрин ситиһиилэриттэн үөрүүтүн үллэстэр, олохтон дуоһуйар, дьоллонор.
Варвара Парникова – Үүйэ, уопсас. кэрэсп.