Атырдьах ыйын 5 күнүгэр Мүрү нэһилиэгин ыччата, анал байыаннай дьайыы кыттыылааҕа, гвардия ефрейтора, «За мужество» уордьан кавалера Василий Даниловка анаммыт пааматынньык искибиэригэр өрө тардыныы, хомунуу субуотунньуга тэрилиннэ.
Субуотунньукка СӨ «Защитники Отечества» судаарыстыбаннай фонда филиалыттан, Уус Алдан улууһун, Мүрү нэһилиэгин дьаһалталарыттан, «Россия ийэлэрэ» улуустааҕы түмсүүтүттэн, анал байыаннай дьайыы бэтэрээннэрэ, Уус Алдантан анал байыаннай дьайыыга кыттыбыт уонна хорсуннук охтубут буойуттар дьиэ кэргэттэрэ, чугас дьонноро көхтөөхтүк кытыннылар.
Субуотунньук кыттыылаахтара искибиэр хоҥнубут таастарын көннөрдүлэр, ыраастааһын үлэтин толордулар. Итиэннэ сибэкки дьөрбөтүн уурдулар. Тэрээһин Мүрү нэһилиэгин сирин-уотун ырааһырдыыга анаммыт ый чэрчитинэн ыытылынна.
Светлана Сивцева