От ыйын 8 күнүгэр Россияҕа Дьиэ кэргэн, таптал уонна эрэллээх буолуу күнэ бэлиэтэнэр. Манан сиэттэрэн, тыа сирин биир маанылаах дьиэ кэргэнин туһунан сэһэргиим.
Уус Алдантан төрүттээх Туяра Андриановна, Эбээн Бытантай улууһуттан төрүттээх Иннокентий Михайлович Мындаабатааҕы спорт оскуолаҕа үөрэнэ сылдьан билсиһэн, доҕордоһон, 2010 сыллаахха олохторун холбоон алаһа дьиэ тэринэн, түөрт оҕону күн сирин көрдөрөн, сүөһү-ас тутан, Гороховтар дэтэн Мындааба бөһүөлэгин биир маанылаах ыала буолан олороллор.
Улахан кыыстара Сардаана быйыл 11-с кылааска, улахан уоллара Миша 8-с кылааска, кыра кыыс Камилла 3-с кылааска тахсаллар, кыра уоллара Кеша – оҕо саадын иитиллээччитэ. Оҕолор туйгун үөрэхтээхтэр, араас олимпиадаларга, күрэстэргэ көхтөөхтүк кытталлар.
Иннокентий Михайлович орто анал үөрэххэ үөрэнэн сыбаарсык идэлээх, оттон Туяра Андриановна СГУ финансовай-экономическай институтугар үөрэнэн бухгалтер идэтин баһылаабыта. Хас да сыл Уус Алданнааҕы Тыа харыстабылын хаһаайыстыбатыгар бухгалтерынан үлэлээбитэ.
Кэргэнниилэр кэлин бааһынай хаһаайыстыба тэринэн онно үлэлииллэр. Ыал аҕата оҕо эрдэҕиттэн таба иитиитигэр сыстан улааппыт буолан, эдэр ыаллар 2013 сылтан бэйэлэрин кыахтарынан сүөһү ииттэргэ быһаарыммыттара. Бастаан утаа түөрт ньирэйи атыылаһан хаһаайыстыба тэринэн саҕалаабыт эбит буоллахтарына, билигин 45 төбө сүөһүлээхтэр, 18 сылгылаахтар. Сэттис сылларын сүөһүлэрин Хатыҥ Сыһыы сайылыкка таһааран сайылыыллар, сайын устата 12 ынаҕы ыан үрүҥ илгэни үрүлүтэллэр.
Түөрт оҕо күн-күбэй ийэтэ бигэ тирэхтээх дьиэ кэргэн буолуу, тыа хаһаайыстыбатын көрүү туһунан маннык кэпсиир:
– Оҕолорбут тэҥҥэ ынах ыаһан, оттоһон бары көмөлөөн үлэлиибит. Саха сиэринэн сүөһү-сылгы ииттэн олорорбутуттан астынабыт эрээри, бэйэбит бас билэр оттуур ходуһабыт суоҕа олус атахтыыр. Сайын ахсын дьон ходуһатын бырыһыаҥҥа оттуубут, сороҕун атыылаһан ылабыт. Ол да буоллар, инникитин улахан хотон туттан, сүөһүбүтүн-сылгыбытын элбэтэр, өбүгэбит үгэһин салгыыр баҕа санаалаахпыт. Бэйэбит сибиэһэй аспытын аһыы олорорбут саныахха да үчүгэй. Дьиэ кэргэн бигэ тирэхтээх, сылаас сыһыаннаах буоларыгар дьиэ кэргэҥҥэ аһаҕас, истиҥ кэпсэтии, биир санаанан салайтарыы баар буолуохтаах. Бэйэ-бэйэни олох хайа баҕарар түгэнигэр өйүү, өйдүү сылдьыахтааххын. Бэйэ икки ардыгар ытыктабыллаах сыһыан баар буолуохтаах. Оҕо кыра эрдэҕиттэн төрөппүттэрин кытта кыра соруктартан саҕалаан үлэлииргэ үөрэниэхтээх, оннук улааппыт оҕо ыарахантан чаҕыйбат үлэһит буола улаатар. Ол кэлин бэйэтигэр туһалаах буоларын төрөппүттэр өйдүөхтээхпит, оҕону олоххо бэлэмниэхтээхпит, онно бэйэбитинэн үтүө холобур буолуохтаахпыт.
Гороховтар улууспут биир көхтөөх ыаллара буолаллар. Түөлбэ, оскуола, оҕо тэрилтэтин тэрээһиннэригэр, күрэстэригэр дьиэ кэргэнинэн актыыбынайдык кытталлар. Сайынын оҕуруот аһын үүннэрэн, сир астаан сайын үтүөтүн билэллэр.
Мария АРГУНОВА