Кырылас кыһыл кумахтаах, кыһыннары-сайыннары күөх бэстэрдээх, күлүмүрдээн оонньуур уйгулаах уулардаах, ымыы чыычаах кэриэтэ
ырыаһыт дьонноох Хомустаах бөһүөлэгин Уһун Сыһыы сайылыгар оскуола саастаах уолаттарга улуус таһымнаах национальнай многоборье күрэхтэһиитэ буолла.
Бырааһынньык үѳрүүлээх чааһыгар Хомустаах оскуолатын директоры үѳрэх чааһыгар солбуйааччы Анна Ховрова кэлбит ыалдьыттары эҕэрдэлээн тыл эттэ. ТОС бэрэссэдээтэлэ, Хомустаах баһылыга Василий Попов эдэр спортсменнарга кэс тылын анаата, спордунан утумнаахтык дьарыктаналларыгар сүбэлээтэ. Күрэхтэһии сүрүн судьуйата Петр Перевалов бүгүҥҥү күн саҥа ааттары, чемпионнары быһаарыа диэтэ, күрэхтэһии быраабылаларын билиһиннэрдэ. Ону таһынан Хомустаах оскуолатыгар олус таһаарыылаахтык Николай Иванов үлэлии сылдьарын бэлиэтээн эттэ. Кини уолаттара улууска, республикаҕа араас күрэхтэһиилэргэ ѳрүү миэстэлэһэллэрин бэлиэтээтэ.
Барыта 6 оскуолаттан 28 спортсмен илин-кэлин түһүстүлэр. Кыра уолаттарга (2013 уонна онтон кыра саастаахтарга) барыта 9 оҕо, 2011 – 2012 сс тѳрүѳх уолаттарга – 10 спортсмен, 2008 – 2010 сыллаахтарга 9 ыччат кытынна.
Барыта биэс кѳрүҥҥэ кииристилэр: тутум эргиир, үс тѳгүл үс, мас тардыһыы, хапсаҕай, сүүрүү. Хас кѳрүҥ аайы бастаабыттарга анал ааттары иҥэрдилэр уонна 3000 солк. харчынан бэлэх биэрдилэр. Уолаттар бары тэҥ баайыылаах буоланнар, интэриэһинэй киирсиилэри кѳрдѳрдүлэр.
Тыҥааһыннаах киирсиилэр кэннилэриттэн кыайыылаахтар быһаарылыннылар.Уопсай түмүккэ кыайыылаах үрдүк аатын 2013 уонна онтон кыра саастаахтарга Хомустаах уолана Алгыс Бочкарев ылла уонна 10000 солк. бириис ылла, кыһыл кѳмүс мэтээли иилиннэ. Кини кэнниттэн иккис миэстэҕэ эмиэ Хомустаах уола Максим Новгородов тигистэ. Кини 5000 солк. уонна үрүҥ кѳмүс мэтээлинэн наҕараадаланна. Үһүс миэстэҕэ Лѳгѳйдөөҕү лицей-интернат үѳрэнээччитэ Ньургун Сивцев буолла. Кини 3000 солк. уонна боруонса мэдээлинэн наҕараадаланна.
2011-2012 сс. уолаттарга 1-кы миэстэ ЛЛИ үѳрэнээччитэ Костя Попов буолла, 10000 солк., кыһыл кѳмүс мэтээл ылан үѳрдэ-кѳттѳ. 2-с миэстэ Суотту уола Денис Харайбатов буолла уонна 5000 солк., үрүҥ көмүс мэтээлинэн наҕараадаланна. 3-с миэстэ Мүрү 2-с № оскуолатыттан Ярик Сивцев буолла. Кини 3000 солк. уонна боруонса мэтээл хаһаайына буолла.
2008-2010 сс. уолаттарга 1-кы миэстэ ЛЛИ үѳрэнээччитэ Артем Захаров буолан. 10000 солк. уонна мэтээлинэн наҕараадаланна, 2-с миэстэ буолбут Тулуна оскуолатыттан Албан Гоголев 5000 солк., мэтээл бириис ылла. 3-с миэстэҕэ Суоттуттан Айаал Баишев тигистэ, кини эмиэ 3000 солк., мэтээл хаһаайына буолла.
Кыра тыаллаах да буоллар, күммүт туран биэрдэ. Олохтоохтор, оскуола коллектива сылаас аһынан хааччыйдылар. Василий Попов дьаһалынан күрэхтэһиини кѳрѳр дьону тастылар. Онон олохтоохтор, ыалдьыттар астынан тарҕастылар. Кыттыбыт уолаттар балай да бириис хомуйан үѳрдүлэр, харахтара уоттанна. Онон, түгэнинэн туһанан, бүгүҥҥү күммүтүгэр бириистэри олохтуурга кыттыспыт биир дойдулаахтарбытыгар ис сүрэхпититтэн махтанабыт. Үрдүктэн үрдүккэ дьулуһуҥ, кэрэттэн кэрэҕэ тардыһыҥ.
Яна Новгородова. Хомустаах