Мындааба спортивнай орто оскуолатыгар үгэскэ кубулуйбут доруобуйаны бөҕөргөтөр сыаллаах-соруктаах сүүрүү уонна хаамыы декадатын түмүгүн таһаарар, кыайыылаахтары наҕараадалыыр үөрүүлээх чааһа буолан ааста.
Декада устата үөрэнээччилэр, оскуола үлэһиттэрэ уонна төрөппүттэр сүүрүүгэ уонна хаамыыга бэйэлэрин кыахтарын көрдөрдүлэр. Хас биирдии кыттааччы сааһыттан тутулуга суох хамсаныы үөрүүтүн биллэ, доруобуйа суолтатын өйдөөн, биир кэлим буолууну көрдөрдө.
Наҕараадалааһын үөрүүлээх тэрээһинэ оскуола спортивнай саалатыгар буолла. Саалаҕа спортивнай тыын ыҥырыылаах, кыайыы-хотуу дуорааннаах музыка тыаһыгар призердар уонна чемпионнар парадтаан киирдилэр. Дириэктэри иитэр үлэҕэ солбуйааччы Алексей Неустроев уонна декада сүрүн судьуйата Александр Егоров эҕэрдэ тылларын эттилэр, декада ситиһиилээхтик ааспытын бэлиэтээтилэр уонна бары кыттааччыларга доруобуйаларын туһугар дьулуурдарын иһин махтанныллар.
Ол кэннэ Е.Ф. Габышев аатынан Оҕо спортивнай оскуолатын сүүрүүгэ тренерэ, республика элбэх төгүллээх кыайыылааҕа Мария Слепцова бэрт сэргэх хамсаныылаах сэрээккэни оҥортордо, эти-хааны уһугуннарда. Хас биирдии оҕо, оскуола үлэһитэ, төрөппүт көхтөөх кыттыыта – биһиги биир кэлим буоларбыт бэлиэтэ.
Кыайыылаахтары наҕараадалааһын араас категорияларынан ыытылынна. Ол курдук оскуола оҕолоругар алын сүһүөх, орто уонна улахан сүһүөх оҕолоро биирдиилээн уонна кылааһынан тыҥааһыннаах киирсиини аастылар. Ону тэҥэ дьахталларга уонна эр дьоҥҥо 3 сүһүөҕүнэн араарыллан ыытылынна. Декадаҕа уопсайа 177 кыттааччы 3033 килэмиэтири сүүрдүлэр.
Бары кыайыылаахтар грамоталарынан, мэтээллэринэн наҕараадаланнылар. Ону тэҥэ, декадаҕа «Муҥутуур кыайыылаах кылаас» аатын 4-с кылаас коллектива, кылаас салайааччыта Екатерина Тарабукина уонна «Муҥутуур чемпион» аатын оскуола биир бастыҥ спортсмена Артур Кириллов ыллылар.
Бу түгэн декада сүрүн сыалын – доруобуйаҕа, спортка дьулуһууну чахчы ситиспитин туоһулаата. Сүүрүү уонна хаамыы декадата Мындааба спортивнай орто оскуолатын олоҕор умнуллубат бэлиэ түгэнинэн буолла. Оскуола салалтата, оскуола үлэһиттэрэ уонна үөрэнээччилэр инникитин даҕаны чөл олоҕу көҕүлүөхпүт, маннык тэрээһиннэри салгыы үрдүк таһымҥа ыытыахпыт диэн эрэннэрдилэр.
Александр Егоров,
Мындаба спортивнай орто оскуолатын физкультураҕа учуутала