Россия спордун бэтэрээнэ, Россия бочуоттаах донора, Саха Өрөспүүбүлүкэтин физическэй култууратын уонна спордун үтүөлээх үлэһитэ, хайыһарга Саха АССР спордун маастара, ССРС спордун маастарыгар кандидат, «Дьокуускай – БАМ – Дьокуускай» хайыһар маршрутунан айан кыттыылааҕа, Саха сирин чөмпүйэнээтин 15-с төгүллээх кыайыылааҕа, сүүрүүгэ 10 000 м дистанцияҕа Саха АССР рекордсмена, «Урожай» ДСО Киин Сэбиэтин бочуоттаах үлэһитэ, «Саха Өрөспүүбүлүкэтин физическэй култуураҕа уонна спорка үтүөлэрин иһин» бэлиэлээх, Мүрү нэһилиэгин бочуоттаах олохтооҕо Владимир Пантелеймонович Слепцов төрөөбүтэ 80 сылынан бүгүн, тохсунньу 22 күнүгэр, Мүрү нэһилиэгэр тэрээһиннэр ыытылыннылар.
Ол курдук «Майаҕатта Бэрт Хара» стадион Аллеятыгар мустан ытык киһибит туһунан улуус баһылыгын сүбэһитэ Иван Колодезников, Мүрү нэһилиэгин баһылыга Прокопий Румянцев, спорт управлениетын салайааччыта Евгений Алексеев, спорт бэтэрээнэ Прокопий Харитонов, үөрэнээччитэ Захар Ильин, кэргэнэ Елена Слепцова үтүө тылларынан санаан ахтан аастылар, кини стендэтигэр сибэкки дьөрбөтүн уурдулар.
С.С. Васильев-Борогонскай аатынан Киин библиотека, Сэһэн Ардьакыап аатынан улуустааҕы кыраайы үөрэтэр түмэл фондаларыттан «Өрүү инники күөҥҥэ» диэн ааттаах быыстапканы кэргэнэ, оҕолоро, аймахтара көрөн махтанан бардылар.
Бу сыл иһигэр В. П. Слепцовка аналлаах эбии тэрээһиннэр, күрэхтэһиилэр ыытыллаллара былааннанар.
Мария Попова, библиотекарь