«Хаарбах дьиэттэн көһөрүү» бырагыраама иккис түһүмэҕэр 2012–2017 сылларга хаарбаҕынан ааҕыллыбыт дьиэлэр киирбиттэрэ уонна 2019 сылтан саҕаламмыт үлэ 2025 сылга түмүктэниэхтээх этэ. Ол эрээри, тутуу араас биричиинэнэн ыйыллыбыт болдьоҕор саҕаламакка, үлэ тохтотуллубута.
Улуус дьаһалтата бу хаалбыт боппуруоһу сөргүтэн, ааспыт күһүнтэн саҕалаан эмиэ маннык кыһалҕалаах улуустары кытта бырабыыталыстыба таһымыгар күүскэ туруорсан үлэлээбитин түмүгэр СӨ Бырабыыталыстыбатын уонна Ил Түмэн тутууга, коммунальнай хаһаайыстыбаҕа уонна энергетикаҕа сис кэмитиэтин өйөбүллэринэн РФ Судаарыстыбаннай Дуумата хаарбах дьиэттэн көһөрүү регионнааҕы бырагырааматын болдьоҕун 2028 сыл балаҕан ыйын 1 күнүгэр диэри уһатар туһунан сокуону ылыммыта.
Онон бу быһаарыы улууспут дьаһалтатын улахан үлэтин түмүгүнэн олоххо киирдэ, салгыҥҥа ыйанан хаала сыспыт 99 кыбартыыраны төнүннэрэн, үлэни сөргүтэн ыытыы – улахан ситиһии.
Муус устар 18 күнүгэр Бороҕон сэлиэнньэтигэр Колхознай уулуссаҕа 58 кыбартыыралаах уопсай дьиэ тутуутун маҥнайгы тирэҕэ үөрүүлээх быһыыга-майгыга түһэрилиннэ. Тутуу үлэтин Айсен Ермолаев салайааччылаах «Дохсун» ХЭТ саҕалаан 2027 сыл IV кыбаарталыгар түмүктүүрэ былааннанар.
«Хаарбах дьиэттэн саҥа, сырдык, толору хааччыллыылаах дьиэҕэ көһүү — биһиги олохтоохторбутугар улахан дьол. Улуус салалтата бу тутуу хаачыстыбалаахтык уонна болдьоҕор түмүктэнэрин тус хонтуруолугар ылыаҕа», – диэн улуус баһылыга Василий Алексеев эттэ.
Улуус дьаһалтатын пресс-сулууспата