Үлэһит үтүөтэ, билиилээх мааныта, хоһуун бастыҥа дьонноох Уус Алдан улууһа тоҕус геройдааҕынан суон сураҕырар. Уус Алдаҥҥа балаҕан ыйын 25 күнүгэр Геройдар күннэрин ыытарга 2005 сыллаахха оччотооҕу улуус баһылыга Иннокетий Бочкарев уурааҕынан бигэргэммитэ. Онтон ыла Геройдар күннэрэ сыл аайы ыытыллар, үрдүк ааттаах геройдарбыт ааттарын санаан-ахтан, араас тэрээһиннэри ыытан кинилэр ааттарын үйэтитэ, үүнэр көлүөнэҕэ дойдуга, үлэҕэ, олоххо тапталы иҥэрэр сыаллаах киэҥ далааһыннаахтык бэлиэтэнэр.
Бүгүн сарсыардаттан улууспут киин уулуссатыгар геройдарбыт тустарынан кэпсэл, ырыа-хоһоон радиорепортаж нөҥүө үөһэттэн кутуллан дьон-сэргэ сүргэтин көтөхтө, улууспут албан ааттаах дьонноругар сүгүрүйэ-махтана киэн туттууну үөскэттэ. Улууспут киинигэр, Мүрү нэһилиэгэр Геройдар аллеяларыгар миитиҥҥэ түмсэн, геройдарбыт пааматынньыктарыгар сибэкки дьөрбөтүн уурдулар. Үөрүүлээх күн үүммүтүнэн эҕэрдэ тылы улууспут баһылыга Василий Алексеев, улуус депутаттарын сэбиэтин бэрэссэдээтэлэ Иннокентий Аммосов эттилэр. Бу күн устата Сэһэн Ардьакыап аатынан улуус историятын мусуойугар геройдарбытыгар анаммыт экскурсия ыытыллар, улууспут бары бибилэтиэкэлэригэр, үөрэх тэрилтэлэригэр быыстапка, онлайн-уруок умсугута тардыаҕа.
Мария АРГУНОВА