Ил Дархан Айсен Николаев 2026 с. от ыйын 16 күнүнээҕи 990 №-дээх Уурааҕынан Саха Өрөспүүбүлүкэтин араас эйгэ үлэһиттэригэр “Үтүөлээх үлэһит” анал ааттары иҥэртээтэ.
Ол иһигэр Уус Алдан улууһуттан С.С. Васильев-Борогонскай аатынан “Уус Алданнааҕы нэһилиэктэр икки ардыларынааҕы кииннэммит библиотека тиһигэ” ааҕааччыны кытта үлэлиир отдел сэбиэдиссэйигэр Галина АММОСОВАҔА “Саха Өрөспүүбүлүкэтин култууратын үтүөлээх үлэһитэ” ааты иҥэрдэ.
Галина Владимировна улуустааҕы С.С. Васильев-Борогонскай аатынан киин библиотекаҕа үлэлээбитэ 40-тан тахса сыл буолла, 25 сыл устата улуус култууратын үлэһиттэрин идэлээх сойууһун салайбыта, улуустааҕы айар куттаахтар “Уһуктуу” түмсүүтүн салайааччыта.
Анна Данилова:
– Галина Владимировна, уһун сыллаах эҥкилэ суох таһаарыылаах үлэҥ сөптөөх сыанабылы ылбытынан тэҥҥэ үөрэн туран ис сүрэхпиттэн эҕэрдэлиибин! Үтүө киһиэхэ үтүөлээх ааты иҥэрии – саамай сөптөөх сыанабыл. Эҕэрдэ!