Бүгүн СӨ Бырабыыталыстыбатын отчуоттуур үһүс бөлөҕө Чэриктэй, Дүпсүн, Өнөр нэһилиэктэригэр үлэлээтэ.
Чэриктэй олохтоохторо оҕо саадыгар хапытаалынай өрөмүөнү, хаарбах туруктаах хочуолунайы солбуйар саҥа хочуолунайы, оһохторугар өрөмүөнү, уу таһар массыынаны, уот линиятыгар хапытаалынай өрөмүөнү, мелиорация үлэтин туруорустулар. Итиэннэ 2018 сылтан спорт саалата суох, нэһилиэнньэ түмсэр сирэ дьоҕус балаҕан дьиэтэ эрэ буолан турар, онон спорт саалатын тутууну күүскэ туруорустулар. Ону таһынан Чэриктэй сиригэр туризмы тэрийэргэ, арыылары өттөөһүн, булт көҥүлүгэр ыйытыылары биэрэн, сүбэ-ама ыллылар. Маныаха оҕо тэрилтэтин тутуу боппуруоһугар смета экспертизаны аастаҕына, кэлэр сылга хамсааһын тахсыаҕын, спорт саалатын тутуу сметата, бырайыага бэлэмин, үбүлээһинэ эрэ быһаарыллыан наадатын, онуоха «Үтүө дьыала» республикатааҕы программа нөҥүө тутуу быйыл саҕаланыан сөбүн, нэһилиэк иһигэр уот өрөмүөнэ быйыл оҥоһулларын туһунан хоруйдар олохтоохтору үөртүлэр.
Дүпсүҥҥэ ититии боппуруоһа күүскэ турда. Хочуолунай оһохторо эргэрэннэр быйыл хаһааҥҥытааҕар да үгүс алдьаныы кыһалҕаны үөскэппит. Ордук оскуола дьиэтэ 5°С тиийэ тымныйан, оҕо үөрэнэригэр усулуобуйа уустугурбут. Онон оһохтору уларытан, күүһүрдэн, ититии ситимигэр эбии ыаллары холбуурга, оскуолаҕа хапытаалынай эбэтэр сылаас буоларын туһугар быстах өрөмүөнү ыытары көрдөһөллөр. Итиэннэ 30 оҕо олорор интэринээт дьиэтэ хаарбах туруга ахтылынна.
Ону тэҥэ В.В.Никифоров-Күлүмнүүр төрөөбүтэ 160 сылынан төрөөбүт дойдутугар кини пааматынньыгын туруорар баҕа санааларын эттилэр. Улахан нэһилиэккэ саҥа спорт саалатын тутары эмиэ туруорсаллар. Төрүт дьарыгы тутан олорор нэһилиэккэ оттуур сир уонна чугаһынан уу суоҕа элбэхтик этилиннэ, Чэриктэй күөлүттэн ууну быраҕар Хаачылыма уу ситимин сөргүтэн үлэлэтэри тыын боппуруоһунан аахтылар.
Өнөргө 1945 сыллаахха тутуллубут оскуоланы солбуйар саҥа оскуола тутуутун боппуруоһа сытыытык турда. Онуоха «Ыччат уонна оҕо» федеральнай программанан кыалларыгар эрэл баарын, ол аҕыйах күнүнэн биллиэҕин туһунан эттилэр. Итиэннэ олохтоохтор саҥа хочуолунай тутуллуутун, уот ситимигэр өрөмүөнү, исписэлиистэр олорор дьиэлэрин тутары, Чубучааны муостатын өрөмүөннүүрү, оскуолаҕа оптуобус массыынаны, балыыһаҕа санитарнай массыынаны туруорустулар.
Мария Аргунова