Бүгүн Өнөр нэһилиэгэр сахалартан бастакы Россия Геройа, биир дойдулаахпыт Михаил Михайлович Стрекаловскай төрөөбүтэ 110 сылынан түөрт дьоруойдаах Байаҕантай нэһилиэгэ кыттыылаах “Герой сулуһа” тэрээһин саҕаланна.
Өнөр нэһилиэгэр үгэс курдук олунньуга Аҕа дойдуга бэриниилээх буолуу ыйа биллэриллэр. Ый устата спорт, култуура, үөрэхтээһин уо.д.а. эйгэлэри хабан араас тэрээһиннэри ыыталлар. Биир улахан суолталаах тэрээһининэн олунньу 4 күнүгэр – М.М. Стрекаловскай төрөөбүт күнүгэр анаан “Герой сулуһа” тэрээһини сыллата ыыталлар. Бу бэлиэ күҥҥэ урукку өттүгэр СӨ Бырабыыталыстыбатын делегацията, Мүрү нэһилиэгин бэтэрээннэрэ, Дьокуускайдааҕы «Айыы кыһата» оскуола үөрэнээччилэрэ ыалдьыттаабыттара.
Оттон бүгүн бу тэрээһиҥҥэ Байаҕантай нэһилиэгин делегацията уонна Михаил Стрекаловкай төрөппүт оҕолоро Любовь Захарова, Екатерина Стрекаловская, ону таһынан сиэннэрэ, чугас аймахтара кэлэн кыттыыны ылыахтара. Тэрээһин оскуола үөрэнээччилэригэр анаан Сэһэн Ардьакыап аатынан улуустааҕы историяны үөрэтэр түмэл уонна Тандатааҕы И.П. Готовцев аатынан историяны, кыраайы үөрэтэр мусуой үлэһитэрэ “Патриотическай санаа” диэн ааттаах уруоктары ыытыыларыттан саҕаланна.
Салгыы күнүс 14:00 чаастан М.М. Стрекаловскай үтүө аатыгар сүгүрүйэн “Өйдөбүнньүк уоту” уматыы чааһа буолоҕа. Ол кэннэ Михаил Стрекаловскай аатынан түмэлгэ “Музейнай чаас”, “Герой паартататын” арыллыыта, Байаҕантай уонна Өнөр нэһилиэктэрин общественноһын төгүрүк остуола буолуоҕа, итиэннэ тэрээһини түмүктүүр чаас кэннэ Байаҕантай, Өнөр нэһилиэктэрин холбоһуктаах “Патриотическай ырыа түһүлгэтэ” тэриллиэҕэ.
Мария Аргунова