Самаан сайын оройугар, күн уота сири-дойдуну угуттуур, айылҕа чэчирии тыллар кэмигэр, от ыйын 1 күнүгэр, биһиги сайыҥҥы күнүскү чэбдигирдэр-үөрэтэр лааҕырбыт аанын тэлэччи аста. Чаҕаархай саҥалар иһилиннилэр, салгыҥҥа алыптаах дьикти иэйии тарҕанна. Дорообо, күндү «Эколят» лааҕырбыт!
Күн бастакы чааһа үөрүүлээх сүпсүлгэнтэн саҕаланна – кырачаан доҕотторбутун үөрэ-көтө көрүстүбүт. Сарсыардааҥҥы линейка барыбытын биир сомоҕо оҥордо – бу хорсун быһыыга, дьиктигэ талаһар сүрэхтэр тэбис-тэҥҥэ битийэр түгэнэ буолла. Оҕолор бэйэ-бэйэлэрин уонна настаабынньыктарын кытта билсэн, доҕордуу этэрээттэргэ арахсан, туспа дьиэ кэргэн курдук буоллулар. Хас биирдии педагог оҕолорун бэйэтин кынатын анныгар ылан, билиини-көрүүнү уонна куттал суох буолуутун быраабылатын сиһилии билиһиннэрдэ.
Ол эрээри, ойуур дьиҥнээх харыстабыллаахтара буолар туһугар, уолаттар-кыргыттар бастакы тургутууну ааһыахтаах этилэр – квест. Бу оонньуу эрэ буолбатах, бу – бастакы арыллыы сиэрэ-туома! Этэрээттэр сорудахтары толорон, кистэлэҥ коду хомуйдулар. Онтон бастакынан кыайыылаах хамаанда биһиги сүрүн девизпит тылларын аҕалла: «Чэлгий, Сир Ийэ! Биһиги — Эколят оҕолоробут!». Бу тыллар бүтүн сезон устата биһигини сирдиир сулуспут буоллулар.
Дьэ, онтон… Үөрүүлээх арыллыы! Халлаан анныгар талаан уонна доҕордоһуу дьиҥнээх феерията буолла – этэрээттэр ааттарын уонна девизтэрин чиэстээхтик көмүскээтилэр.
“Эколята” оҕолорун Уус Алданнааҕы судаарыстыбаннай экологическай надзор инспекциятын старшай судаарыстыбаннай инспектора Нюргун Охлопков эҕэрдэлээтэ. Онтон бары биир киһи курдук “Эколят” андаҕарын эттилэр уонна Гимн ыллаатылар.
Онтон бырааһынньык үҥкүү алыптаах долгунугар уйдарда! Биһиэхэ ыалдьыттыы хореограф Платон Стрекаловскай «Интенсив» лааҕыртан үҥкүү бөлөҕүн кытта кэллилэр. Үҥкүү баттла чуумпуну аймаата: уоттаах-күөстээх энергия, тэтим уонна мичээр былаһаакканы толорон кэбистилэр!
Ити курдук биһиги улахан дьиэ кэргэммит таҥыллан таҕыста: «Светлячок» этэрээт (салайааччы Светлана Анатольевна) – эрэл сырдыга; «Экос» этэрээт (салайааччы Алексей Алексеевич) – билиини-көрүүнү баһылааһын күүһэ; «Кустук» этэрээт (салайааччы Туйарра Григорьевна) – олох араас өҥөү; «Эколята» этэрээт (салайааччы Альбина Васильевна) – лааҕырбыт сүрэҕэ; «Природа» этэрээт (салайааччы Семен Семенович) – үйэлэр муударастара.
Биһигини бүтүн сайын устата умнуллубат арыйыылар күүтэллэр! Хас биирдии күн үөрэҕинэн, айар куонкурустарынан уонна умсугутуулаах тэрээһиннэринэн толору буолуо. Оҕолор кылаас иһигэр эрэ буолбакка, бааһыналарга кыахтарынан көмөлөһөн, сир кистэлэҥин илиилэринэн тутан-хабан билсиэхтэрэ.
Бу сайын хас биирдии оҕо сайдарыгар, саҥаны арыйарыгар уонна доҕордоһуу дьиҥ суолтатын билэригэр көмөлөстүн! Лааҕыр оҕолорго туһалаах буоллун, оттон кинилэр сүрэхтэрэ мэлдьи девизпитигэр бигэннин: «Чэлгий, Сир Ийэ! Биһиги — Эколята оҕолоробут!».
Светлана Сен-Дун-Шен