Бэс ыйын 24-26 күннэригэр Дьокуускайга 12-с төгүлүн ыытыллыбыт Арассыыйа эдэр бибилэтиэкэрдэрин «Грани библиотекаря» форумнарыгар 18 регионтан 240 эдэр бибилэтиэкэр муһунна. Бу форумҥа биһиги улууспутуттан барыта 9 эдэр бибилэтиэкэр кытынна.
Лена Павлова, кииннэммит бибилэтиэкэ тиһигин дириэктэрэ:
– Үс күн устата киэҥ программанан бибилэтиэкэрдэр саҥа технологиялары уонна оҥоһуу өйү үлэҕэ киллэриини, саамай сүрүнэ, ааҕааччы интэриэһин тардыы саҥа ньымаларын туһунан дьүүллэстилэр. Дириэктэрдэргэ уонна методистарга аналлаах «Библиотеки будущего» идэлэрин үрдэтинэр курс ыытылынна. Үлэ уопутун атастаһыы быһыытынан олоххо ситиһиилээхтик киирэн үлэлии сылдьар бырайыактары билиһиннэрдилэр. Биһиги улууспутуттан форум чэрчитинэн ыытыллыбыт «Книжный ветер» Аан дойдутааҕы II бэстибээлгэ бибилэтиэкэр Татьяна Бурцева кытынна. Баатаҕай нэһилиэгин бибилэтиэкэтин сэбиэдиссэйэ Августина Пермякова «Интерактивная карта-гид Батагайского наслега» диэн дакылааты оҥорон форум кыттыылаахтарын сэҥээриитин ылла. Ыччат бибилэтиэкэтин бастыҥ бырайыагар Бүтүн Арассыыйатааҕы III куонкурус финалыгар Тамара Орлова «Бессмертный материнский подвиг» интернет сайт бырайыага киирэн Арассыыйа судаарыстыбаннай бибилэтиэкэтин анал бирииһинэн наҕараадаланна.
Татьяна БУРЦЕВА, киин бибилэтиэкэ сүрүн бибилэтиэкэрэ:
– Билиҥҥи кэмҥэ кинигэни ааҕар, кинигэни таптыыр, сэҥээрэр киһи олус элбээтэ. Бэс ыйын 23-26 күннэригэр Дьокуускай куоракка «Книжный ветер» диэн ааттаах Норуоттар ардыларынааҕы II бэстибээл сэргэхтик ыытылынна. Кинигэ улахан бырааһынньыга Комсомольскай болуоссакка 26 араас кинигэ кыһатын, суруйааччылары, тылбаасчыттары уонна литэрэтиирэни сэҥээрээччилэри түмтэ.
Бу тэрээһин сүрүн сыала сахалыы уонна атын да омук тылынан суруллубут айымньылары киэҥ араҥаҕа билиһиннэрии, ааҕыыны көҕүлээһин буолар. Билиҥҥи цифровизация үйэтигэр маннык тэрээһиннэр олус улахан суолталаахтар. Ол эбэтэр, кинигэни илиигэ тутан ааҕыы бэйэтэ ураты эйгэни үөскэтэр.
«Книжный ветер» бэстибээл хас да сүрүн хайысханан ыытылынна. Ол курдук, кинигэ дьаарбаҥкатыгар ааҕааччылар саҥа тахсыбыт кинигэлэри маҕаһыыннааҕар чэпчэкитик издательство сыанатынан атыылаһар кыахтаналлар, оттон тус көрсүһүүлэр уонна маастар-кылаастар хайысхаларыгар суруйааччылары кытта атах тэпсэн олорон кэпсэтии, кинигэ иллюстратордарыттан уруһуй уонна дизайн үөрэхтэрэ тэрилиннилэр.
Бу улахан бэстибээл хас биирдии сылдьыбыт киһи сайдарыгар, саҥаны билэригэр улахан кыаҕы биэрэр. Быйылгы тэрээһин биир саамай ураты уонна суолталаах хайысхатынан харахтарынан көрбөт уонна мөлтөхтүк көрөр дьоҥҥо аналлаах ураты быыстапка тэриллибитэ буолла. Манна көрбөт дьон уопсастыбатын уонна анал бибилэтиэкэ үлэһиттэрэ бэйэлэрин уопуттарын, ситиһиилэрин киэҥ араҥаҕа таһааран көрдөрдүлэр.
Бу хайысхаҕа биһиги улууспут киин бибилэтиэкэтэ бэйэтин ыытар үлэтин туһунан быыстапкаҕа көрдөрдө. Ол курдук Өрөспүүбүлүкэтээҕи көрбөттөр бибилэтиэкэлэрэ тэрийэн ыыппыт күрэһигэр иккис миэстэни ылбыт «Семья. Чтение. Вдохновение» диэн бырайыагы билиһиннэрдибит. Доруобуйатынан хааччахтаах киһи дьиэ кэргэнин өйөбүлүнэн үгүс тэрээһиҥҥэ кыттан, элбэҕи билэн, истэн олоҕу кытта тэҥҥэ хааман иһэригэр сүрүн болҕомто ууруллара тоҕоостоох.
Маннык инклюзивнай быыстапкаҕа кыттан үгүһү билэн-көрөн, элбэх үлэ уопутун ылан кэллибит. Кэлэр бэстибээллэргэ да кыттарга ыра санаалаах, сонун көрүүлээх үлэбитин түмүктээбиппит. Бэстибээлгэ кыттарга ыҥырыыны ыыппыт өрөспүүбүлүкэтээҕи көрбөттөр бибилэтиэкэлэригэр махтанабыт.
Сахаайа КОПЫРИНА, куйаар ситимин нөҥүө үлэлиир ааҕар киин бибилэтиэкэрэ:
– «Грани библиотекаря» диэн форум аата да этэрин курдук аныгы кэм бибилэтиэкэрэ алмаас таас курдук үгүс өрүттээх дьоҕурдаах буолуохтаах. Онно сөп түбэһиннэрэн, форум саҥа билии ыларга уонна уопут атастаһар олус киэҥ программалаах былааһакка быһыытынан тэриллибит. Быйылгы сүрүн уратыта диэн оҥоһуу өй уонна аныгы технологиялар тиэмэлэрин дириҥэтэн ырытыы, бибилэтиэкэҕэ салайар үлэни тэрийии, маркетинг, каадыры сайыннарыы буолла. Саха сирин социокультурнай сайдыыта, ааҕааччы интэриэһин үрдэтии, лидерство, карьера, социальнай бырайыактары киллэрии боппуруостарыгар ырытыһыылар буоллулар.
Форум дьыалабыай программата олус интэриэһинэйдик барбыта. Ол курдук Ыччакка аналлаах Арассыыйа судаарыстыбаннай бибилэтиэкэтин салайааччыта Антон Пурник, Коломна куорат бибилэтиэкэтин тиһигин салайааччыта Елена Генералова, Новосибирскай уобалас ыччакка бибилэтиэкэтин солбуйар салайааччыта, РБА Ыччат салаатын Бэрэссэдээтэлэ Елена Агарина уопуттарыттан дакылааттарын сэргээтибит.
Регионнар бырайыак оҥоруутугар уопуттарын үллэһиннилэр, оҥоһуу өй технологияларын бибилэтиэкэҕэ туһаныы туһунан презентация, социальнай ситимнэргэ үлэни сөпкө сырдатыы, билиҥҥи кэм лидердэрин кытта кэпсэтии болҕомтону тардан, сарсыҥҥы кэм бибилэтиэкэтин үлэтигэр сонун идеялары киллэрэргэ төһүү күүс буолла.
Туйаара БОРИСОВА, Кэптэнитээҕи 8 N-дээх модельнай бибилэтиэкэ сэбиэдиссэйэ:
– Форумҥа сылдьан кэлбиппиттэн үөрдүм. Элбэх саҥаны биллибит-көрдүбүт, интэриэһинэй бырайыактары сэҥээрдим. Бэйэбит биир идэлээхтэрбит үлэлэрин уопуттарыттан элбэҕи, саҥаны билэн, сэргээн, астынан кэллибит. Форум тэрийээччилэригэр улахан махталбытын тиэрдэбит.
Варвара НЕУСТРОЕВА, Оҕо бибилэтиэкэтин сүрүн бибилэтиэкэрэ:
– Форумҥа аныгы кэмнээҕи бибилэтиэкэ сайдыыта, ол эбэтэр куйаар ситимин уонна саҥа цифровой технологиялары олоххо киллэрии туһунан кэпсээтилэр. Элбэх саҥа сонун бырайыактары, технологиялары билэн-көрөн астынан кэллибит.
Евдокия НЕУСТРОЕВА, комплектование уонна обработка салаатын сүрүн бибилэтиэкэрэ:
– Эдэр бибилэтиэкэрдэр форумнара биһиэхэ уопут атастаһарга уонна ааҕааччылар өҥөлөрүн тупсарарга саҥа идеялары көрдүүргэ олус көмөлөстө. Бибилэтиэкэлэри цифровизациялааһын секциятын сэргии иһиттим, туһанным.
Туйара ОКОЕМОВА, информационнай методическай Киин сүрүн бибилэтиэкэрэ:
– Форум чэрчитинэн бибилэтиэкэ эйгэтин тирээн турар суолталаах боппуруостарын ырытыстылар. Эдэр специалистар бэйэлэрин бастыҥ үлэлэрин уонна бырайыактарын билиһиннэрдилэр. Олус интэриэһинэй маастар-кылаастар, дискуссиялар уонна лекциялар буоллулар.
Бу форум эдэр үлэһиттэр бэйэ-бэйэлэрин кытта билсэллэригэр уонна саҥа таһымҥа тахсалларыгар улахан тирэх буолла.
Тамара ОРЛОВА, Куйаар ситимин нөҥүө үлэлиир Киин сүрүн бибилэтиэкэрэ:
– Форум чэрчитинэн ыытыллыбыт Россия таһымнаах бырайыактары көрүү конкурсугар үлэбит 10 бастыҥ иһигэр киирдэ. Куонкуруска Россия сүрүн государственнай бибилэтиэкэтин биһирэбилин ылан, дойду масштабыгар тахсыбыта биһиэхэ улахан үөрүү, үлэбитигэр стимул буолар.
Августина ПЕРМЯКОВА, М.К. Федорова аатынан Баатаҕайдааҕы 1 N-дээх бибилэтиэкэ сэбиэдиссэйэ:
– Ыччат саастаах оҕолорго аналлаах ааҕыы кулуубун, биллэр дьон туһунан медиаподкаст, оҥоһуу өйү туһанан оҥоһуллубут бырайыактары ордук биһирээтим. Республика, улуустар, соҕуруу куораттар бибилэтиэкэрдэрэ ааҕыыга, цифровой эйгэҕэ күүскэ үлэлэһэллэрин бэлиэтии көрдүм.
Сайыына РУМЯНЦЕВА, Өспөхтөөҕү 14 N-дээх бибилэтиэкэ сэбиэдиссэйэ:
– Бэйэм үлэбэр араас куруһуоктары олохтоох култуураны уонна үгэстэри өйүүр тэрээһиннэри тэрийэн ыытарга саҥа көрүү киирдэ. Кырдьаҕастар муударастарын эдэр ыччакка тиэрдиигэ биһиги бибилэтиэкэттэн саҕаланыан сөп эбит. Бибилэтиэкэр кинигэ биэрэр эрэ киһи буолбакка, нэһилиэк сайдыытын сүрүн драйвера буолуон сөптөөҕүн өйдөөтүм.
Гаврил СИВЦЕВ, куйаар ситимин нөҥүө үлэлиир ааҕар Киин бибилэтиэкэрэ:
– Мин техническэй специалист быһыытынан, цифровизацияҕа сыһыаннаах боппуруостары – Саха сирин Национальнай бибилэтиэкэтэ ыыппыт ИИ-платформатын билиһиннэриитин уонна бибилэтиэкэ үлэтигэр оҥоһуу өйү киллэрии туһунан сессиялары өрө көтөҕүллэн туран иһиттим. Бу идеялары бэйэбит сыыппаранан өҥөлөрбүтүн Уус Алданнааҕы кииннэммит бибилэтиэкэ ситимин электроннай каталогын уонна сайты сайыннарарга туһаныаҕым.
Сахаайа КОПЫРИНА, куйаар ситимин нөҥүө үлэлиир ааҕар Киин бибилэтиэкэрэ:
– Саҥа үлэлээн эрэр бибилэтиэкэр буолабын. Үлэбин олус сөбүлээтим. Форумҥа сылдьан аныгы кэм бибилэтиэкэтин үлэтигэр тус бэйэбэр элбэх саҥаны арыйдым, кэллиэгэлэрбин кытта билистим.
Матырыйааллары Лена Павлова, Сахаайа Копырина бэлэмнээтилэр