Балаҕан ыйын 4-6 күннэригэр Бүтүн Россиятааҕы “Юнармия” хамсааһын чэрчитинэн, өрөспүүбүлүкэтээҕи “Аҕа дойдуну көмүскээччилэр” үэрэнээччилэр уонна эдэр ыччат патриотическай слеттара Дьокуускай куоракка кадеттар оскуола-интэрнээттэригэр ыытылынна.
Өрөспүүбүлүкэ 7 улуустарыттан 70 эдэр армеецтар байыаннай-спортивнай күрэхтэһиигэ, маастар-кылаастарга араас хабааннах ааксыйаларга кытыннылар. Күрэхтэһии үөрүүлээх аһыллыытыгар наука уонна үөрэх министиэристибэтин миниистир бастакы солбуйааччыта Ньургун Павлов кыттыыны ылла уонна маннык тэрээһиннэр ыччаты ийэ дойдуларын көмүскүүргэ бэлэмниир сыаллаах ыытылларын, тыһыынчанан ыччат бу сылларга ситиһиилээхтик кыттыбыттарын бэлиэтээтэ. Бу күннэргэ Владивосток куоракка Бүтүн Россиятааҕы “Зарница 2.0” оонньуу ыытылла турарын, онно А.Н. Осипов аатынан Бэрдигэстээх орто оскуолатын эдэр армеецтара өрөспүүбүлүкэ чиэһин көмүскүү сылдьалларын кэпсээтэ. Онтон “Бастакылар”региональнайдааҕы сэбиэттэрин уонна “Юнармия” байыаннай патриотическай уопсастыбаннай хамсааһын штабын салайааччыта Алексей Кузьмин быйыл Чурапчы улууһугар эдэр армеецтары бэлэмниир сыантыр аһылларын эттэ.
Бу күрэхтэһиигэ улууспут Мүрү 1-гы №-дээх орто оскуолатын Женя Бочкарев хамандыырдаах «Мүрү” байыаннай-патриотическай кулууба ытыыга 1-ы миэстэ, военизированнай эстафетаҕа 2-с миэстэ, тестированиеҕа уонна строевой көрүүгэ 3-с миэстэ ылан, балачча дьаныардаахтык киирсэн, уопсайга үһүс миэстэни ылан кэллэ. Хамандыыр Женя Бочкаревка Ф.А. Поморцев аатынан юнармейскай мэтээл туттарылынна. Хамаанданы улуустааҕы “Юнармия” ыстаабын салайааччыта Мария Винокурова уонна Мүрү 2-с №-дээх орто оскуолатын учуутала Семен Прибылых илдьэ сырытттылар.
Кылгас кэм иһигэр хамаанданы бэлэмнэспит улууспут учууталларыгар Александр Николаевка, Юрий Протопоповка, Максим Гоголевка, Иннокентий Жирковка уонна Семен Прибылыхха оҕолор махталлара улахан, онтон салайааччылар үөрэх управлениетын начальнигар Степан Литвинцевка транспорынан көмөлөспүтүгэр махтаналлар.
Мария Аммосова, уопс.кэрэсп, Бороҕон, Мүрү 1-гы №-дээх орто оскуолатын педагога