Дүпсүн нэһилиэгиттэн билигин биэс киһи байыаннай дьайыыга кытта сылдьар. Онтон үһэ быстах хомуурга хабыллан барбыта. Дүпсүн нэһилиэгин дьоно-сэргэтэ хаххалыыр сиэккэни өрүүттэн саҕалаан, биир дойдулаахтарыгар көмө ыытарга кыһаллар көхтөөх нэһилиэктэртэн биирдэстэрэ буолар. Байыаннай дьайыы саҕаланыаҕыттан, көмөнү тэрийэргэ, көҕүлүүргэ ылсан үлэлэһэ сылдьар киһинэн Елизавета Алексеева буолар. Кини үйэ чиэппэрэ нэһилиэк дьаһалтатыгар үлэлээн биэнсийэҕэ тахсан баран, «Сардаана» кийииттэр түмсүүлэрин уонна «Далбар» үҥкүү бөлөҕүн салайар. Онон куруук дьон кэккэтигэр сылдьыбыт Елизавета Петровна аны байыаннай дьайыыга кытта сылдьар биир дойдулаахтарыгар кыратык эмит көмөлөспүт киһи диэн санааттан, нэһилиэгин дьонун түмэр, иилиир-саҕалыыр түбүккэ сылдьар.
Салгыы дүпсүннэр хайдах-тугу көмөлөһөллөрүн туһунан Елизавета Петровна маннык кэпсээтэ:
– Бастаан хаххалыыр сиэккэлэри оҥорон саҕалаабыппыт. Бастаан утаа оҥортообут сиэккэлэрбитин Бороҕонҥо ыытар этибит, онтон суолбут мөлтүүр кэмигэр куоракка тиксэрэрбит ордук диэн, Дьокуускайга Короленко аатынан уулуссаҕа баар 6-с пуунҥа илдьэн туттарар буолбуппут. Итиэннэ харчыбытын ыытан, кинилэр нөҥүө Новосибирскай куораттан матырыйаалбытын ылларар буолбуппут, онно матырыйаал сыаната маннааҕар үс бүк чэпчэки. Бастаан саҕалыырбытыгар Бороҕонтон ылар этибит даҕаны, онно дуоннаах сиэккэ тахсыбат этэ. Харчыбытын наар 100 солк. саҕалаан ким хаһы биэрэринэн хомуйааччыбыт.
Быйыл нэһилиэк дьаһалтата 15000 солк. көрбүтэ. Манна сиэккэ өрөргө нэһилиэк дьиэҕэ олорооччу өттө, ким хайдах бириэмэлээҕинэн кэлэн кыттыыны ылаллар, оттон лентатын кырыйарга нэһилиэк тэрилтэлэрэ: Дүпсүн учаастактааҕы балыыһатын, «Сардаҥа», «Кэскил» оҕо тэрилтэлэрин, Дүпсүн орто оскуолатын, интернатын, «Дүөндү» сынньалаҥ киинин кэлэктииптэрэ көмөлөһөллөр. Онон, түгэнинэн туһанан, улууһум хаһыатын нөҥүө нэһилиэгим дьонугар-сэргэтигэр барҕа махталбын тиэрдэбин.
Ити курдук, Дүпсүн дьоно-сэргэтэ 82 устуука (холбоон 432 иэннээх) хаххалыыр сиэккэни, 100 устуука повязка кэмпилиэгин, 2 устуука наһыылканы, 35 устуука блиндаж чүмэчитин оҥорон уонна 12000 суумаҕа эмп-томп ылан ыыппыттар. Бу курдук биир дойдулаахтарбыт этэҥҥэ эргиллэн кэлэллэригэр хас биирдии киһи көмөтө олус суолталааҕын күннэтэ көрөбүт.
Мария Аргунова