Түөрт сылга биирдэ доруобуйаларынан хааччахтаахтарга “Дьулуур” спартакиада ыытыллар. Быйыл бэс ыйыгар Дьокуускайга буолуохтаах, бу иннинэ Аммаҕа ыытыллыбыта.
Быйыл “Дьулуур” зачетугар киирэр дуобат уонна саахымат күрэһэ кулун тутар 16-20 күннэригэр ыытылынна, онно биһиги, улуус спортсменнара, киирэн 14 улууһу кытта илин-кэлин түһүстүбүт.
Ол түмүгэр истибэттэр ортолоругар саахымакка Семен Егорович Заровняев (Суотту), Семен Иннокентьевич Гоголев (Сыырдаах) уонна Татьяна Васильевна Борисова (Уһун Күөл) республикаҕа иккис миэстэни ыллылар.
Оттон дуобакка Николай Николаевич Пермяков (Хоноҕор), Семен Иннокентьевич Гоголев (Сыырдаах) уонна Мария Ивановна Копырина (Дүпсүн) састааптаах хамаанда 14 улуустан республика чемпионнара буоллубут.
Ону таһынан дуоскаларынан биирдиилээн киирсиигэ саахымакка бастакы дуоскаҕа Суоттуттан киирсибит С.Е. Заровняев үһүс миэстэ, С.И. Гоголев иккис дуоскаҕа үрүҥ көмүс призер буоллулар. Дуобакка Хоноҕортон сылдьар Н.Н. Пермяков бастакы дуоскаҕа оонньоон, икки гроссмейстеры: биирэ Дьокуускайтан сылдьары кыайан уонна биирэ Ньурбаттан кэлбити кытта тэҥнэһэн хамаанда үөрүүтэ муҥура суох буолла. Итиэннэ дуобакка иккис дуоскаҕа оонньообут С.И. Гоголев (Сыырдаах) чемпион үрдүк аатын ылла.
Бу күрэскэ көрбөттөр хамаандалара 7-с уонна ПОДА-лар 6-с буоллулар. Ити даҕаны куһаҕана суох, 14 хамаандаттан орто көрдөрүү. Көрбөттөргө иккис дуоскаҕа оонньообут Петр Иванов (Майаҕас) иккис дуоскаҕа республикаҕа боруонса мэтээл хаһаайына буолла.
Сотору сүүрүүгэ, олорон эрэ волейболга уонна теннискэ күрэстэр буолуохтара. Онтон сайын “Дьулуур” спартакиадаҕа хамаанданан уонна биирдиилээн мэтээл кэтэр иһин күрэхтэһиэхпит.
Ирина Басыгысова, истибэттэр улуустааҕы уопсастыбаларын бэрэссэдээтэлэ