Саха киһитигэр төрөөбүт дойду тардыылаах, ахтылҕаннаах. Онон уоппуска кэмигэр дойдубар Түүлээххэ тахса сылдьабын.
Түүлээх нэһилиэгэ кыра-кыра уһун синньигэс кырдалларынан тарҕанан олорор. Саамай киин сирбит Кырдал диэн ааттанар. Былыргыттан нэһилиэк тэрилтэлэрэ, маҕаһыын онно бааллар.
Кырдалга баран килиэп, кыра ол-бу дьиэҕэ наадалаахтары атыыластым. Геннадий Михайлович Жирков «Оптимист» диэн бородуукта уонна хаһаайыстыбаннай маҕаһыыннарыгар тыа киһитэ наадыйара барыта баар эбит. Ас-үөл күн аайы кэриэтэ мотуорунан кэлэ турар.
Нэһилиэк дьоно уонна өрөспүүбүлүкэ иһигэр да, оннооҕор тас дойдуларга олорор биир дойдулаахтарбыт бары биир санаанан өйөөн, кыттыһан ылбыт мини-бэкээринэбит нэдиэлэҕэ үс күн сибиэһэй килиэби оҥорон таһаара турар. Манна уоппускатын кэмигэр улахан уопуттаах Ольга Степановна Громова сөбүлэһэн биэкэрдии сылдьар, онон олохтоохтор киниэхэ улаханнык махтанабыт. Ити курдук кэккэ сылларга нэһилиэккэ биир сүрүн кыһалҕа быһаарыллыбыт – маныаха улуус баһылыга Василий Алексеев таба өйдөөн, өйөөн, 300 тыһыынча солкуобайы көмөлөһөн, нэһилиэк баһылыга Станислав Винокуров туруорсан, төрөөбүт нэһилиэгин туһугар бэриниилээхтик үлэлиир урбаанньыт Геннадий Жирков сөбүлэһэн, нэһилиэнньэ бэкээринэлэнэн абыраммыт.
Дойдубар баһаар кэнниттэн оттуур ходуһалар туруктара мөлтөөн, суоллары умайбыт мастар дэлби бүөлүү түһэн, тиэхиньикэ кыайан сылдьыбат буолан, ыаллар сылтан-сыл сүөһүлэрин ахсаанын аччаттылар, сорохтор олох да эстилэр. Ходуһалара баһаар кэнниттэн уутуйан, эбии алдьанан иһэр. Төрүкү да улахан хонуута, алаас курдук киэҥ оттуур сирэ суох нэһилиэк уулаах, дулҕалаах сирдэрэ баһаар кэнниттэн өтөрүнэн оспот гына алдьаммыттар…
Аллараанан сырыы суоҕун кэриэтэ. Кураан күннэргэ олохтоох уолаттарбыт Михаил, Степан Бережневтар, Андрей Неустроев бэйэлэрин күүстэринэн айан суолун мөлтөх өттүн оҥорон бүтэрбиттэрин кэнниттэн, уһун ардах кэмигэр тыаттан куруҥ уута киирэн, айан суола билигин эмиэ мөлтөөн турар эбит. Хам-түм улахан көлүөһэлээх аныгы тиэхиньикэ биирдэ эмит сылдьарын этэллэр.
Өрүһүнэн сырыыга субсидия ылбыт «Лазурнай» чааһынай катер эмиэ бензин суоҕунан биирдии рейси көтүтэ- көтүтэ син кэлэн барар. Ол эрээри, бензининэн хааччыллыы салгыы уустук балаһыанньатыгар, бу да тэрил тохтуон сөп.
Онон, нэһилиэк олохтоохторун айаннарын билигин урбаанньыт Г.М. Жирков уонна, айанныахтаах киһи элбээтэҕинэ көрдөстөхтөрүнэ, К.Г. Афанасьев уу мотуорунан таһаллар эбит.
Дойдум сонуннарыттан кылгастык итинник.
Надежда Громова