Ыам ыйын 11 күнүгэр Уһук Илиҥҥи региоҥҥа иитии боппуруостарыгар анаммыт саамай улахан форум саҕаланар.
Бу Южно-Сахалинскай куоракка ыытыллар «Новая философия воспитания» уокуруктааҕы форумҥа Уус Алдан улууһуттан куонкуруһу ааһан, иитии үлэтигэр бастыҥ дириэктэр сүбэһиттэрэ кытталлар.
Бүгүн Сахалиҥҥа бастакы бөлөх – иитии үлэтигэр дириэктэр сүбэһиттэрэ 53 киһи көтөн тиийдилэр. Кинилэр ортолоругар бааллар: Мария Васильева (Мүрү 1-кы N-дээх ОО), Екатерина Неустроева (Мүрү 2-с N-дээх ОО), Феодосия Сыроватская (Суотту орто оскуолата), Марина Жиркова (Тулуна орто оскуолата), Елена Гоголева (Орто Эбэ анал коррекционнай оскуола-интерната).
Форумтан тугу күүтэрин туһунан санаатын Мария Васильева маннык үллэстэр:
«Мин маннык таһымнаах форумҥа быйыл бастакыбын кыттан, куонкуруһу ааһан, бүгүн Сахалиҥҥа көтөн кэллибит. Олус диэн долгуйан туран биир идэлээх коллегаларбыттан элбэх саҥаны билиэм диэн эрэнэбин. Саҥа билсиһии, саҥа сир барыбытыгар элбэх ситиһиини, билиини аҕаллын».
Бу форум — биһиги дойдубут инники кэскилигэр киллэрэр кылааппыт. Южно-Сахалинскайдааҕы форум күүс-көмө, саҥа санаалары, үөрэҕи бэлэхтиэҕэ диэн эрэллээхпит.
Марина Жиркова, Тулуна орто оскуолатын иитии үлэтигэр дириэктэр сүбэһитэ