Дьокуускайга «Үлэ киһитэ» бириэмийэни ылбыт 50 чулуу үлэһит ортотугар Дүпсүнтэн төрүттээх Светлана Никитина уонна Петр Ушницкай чиэстэннилэр.
Дүпсүн сирэ уруккуттан да удьуор үлэһит дьонунан сураҕырар. Ол үтүө үгэс салҕанара Дүпсүн дьонугар үөрүүнү үксэттэ. Ил Дархан «Үлэ киһитэ» бириэмийэтин лауреатынан Таатта улууһун Чөркөөҕүн олохтооҕо Светлана Никитина (Стрекаловская) буолла. Светлана Захаровна 1977 сыллаахха Дүпсүн орто оскуолатын үөрэнэн бүтэрбитэ. 1982 сыллаахха СГУ СХФ ветеринарнай факультетын үөрэнэн бүтэрэн, Таатта оройуонун «Таатта» сопхуоһугар ветбырааһынан үлэтин саҕалаабыта. 44 сыл устата, ол иһиттэн 26 сыл ветлечебница сэбиэдиссэйинэн, сөбүлүүр идэтинэн дьаныардаахтык үлэлээн кэллэ. Билими кытта быраактыканы дьүөрэлээбит үлэтин, өр сыллаах чинчийиитин түмүгүнэн 2010 сыллаахха биологическай билимҥэ кандидатскай диссертациятын ситиһиилээхтик көмүскээбитэ. СӨ үтүөлээх ветеринарнай бырааһа, Таатта улууһун Октябрьскай нэһилиэгин бочуоттаах олохтооҕо.
Инбэлииттэргэ Саха сириттэн Арассыыйаҕа дуобакка бастакы гроссмейстер, СӨ физкултуураҕа уонна успуорка үтүөлээх үлэһитэ, Дүпсүн нэһилиэгин бочуоттаах гражданина, адаптивнай физкултуура уонна успуорт өрөспүүбүлүкэтээҕи Киинин дуобакка тириэньэрэ Петр Ушницкай Ил Дархан бириэмийэтин тутта. Петр Петрович аан дойду, Европа, Арассыыйа дуобакка чөмпүйэнээттэрин үгүс кыайыылааҕын бэлэмнээбит тириэньэр буолар. Тириэньэрин бэлиэ күнүн көрсө Зеленоград куоракка ыытыллыбыт дуобакка Арассыыйа чөмпүйэнээтигэр (мөлтөхтүк истэр дьон ортотугар) Петр Петрович иитиллээччитэ,
Тааттаттан төрүттээх Сайыына Юнчанова чөмпүйүөн аатын сүктэ. Ыам ыйын 19 күнүгэр Петр Петрович Сайыыналыын Турцияҕа аан дойдутааҕы чөмпүйэнээккэ кытта көтүөхтээхтэр.
Елена Сыроватская, уопсас. кэрэсп.