Бүтүн Арассыыйатааҕы, Өрөспүүбүлүкэтээҕи олимпиадалар, научнай-практическай кэмпириэнсийэлэр кыайыылаахтарын, Бүтүн Арассыыйатааҕы «Профессионалы» идэ таһымын көрүү, инбэлиит уонна доруобуйаларынан хааччахтаах оҕолорго «Абилимпикс» өрөспүүбүлүкэтээҕи чемпионаттар кыайыылаахтарын чиэстиир үөрүүлээх тэрээһин муус устар 24 күнүгэр буолан ааста.
Тэрээһиҥҥэ Уус Алдан улууһун баһылыгын солбуйааччы Григорий Аргунов, үөрэх улуустааҕы салалтатын салайааччы Федор Татаринов, солбуйааччылар Иван Никонов, Тимофей Григорьев, салайааччылар, педагогтар уонна үөрэнээччилэр кытыннылар.
Үөрүүлээх тэрээһини Россия образцовай «Кэнчээри» оҕо норуодунай ансаамбылын эстраднай бөлөҕө (сал. Оксана Атласова), Бороҕоннооҕу оҕо искусствотын оскуолатын баянистара, солист Петя Черкашин (сал. Станислав Луковцев), Мүрү 1 №-дээх орто оскуолатын 9 «б» кылааһын үөрэнээччитэ Кирсан Алексеев, Мүрү 2 №-дээх орто оскуолатын уонна Оҕо искусствотын оскуолатын «Оһуор» үҥкүү ансаамбыла (сал. Ульяна Ноговицына), Мындааба спортивнай орто оскуолатын «Долун» вокальнай ансаамбыла (сал. Диана Павлова), Мүрү 2 №-дээх орто оскуолатын 9-с кылааһын үөрэнээччитэ Айсен Кутуков, Мүрү 2 №-дээх орто оскуолатын «Кустукчаан» вокальнай бөлөҕө (сал. Марианна Колодезникова) киэргэттилэр. Оттон Оҕону эбии үөрэхтээһин киинин педагогтара оҕолррго Республика күнүгэр аналлаах аралдьытыыны ыыттылар.
Тэрээһин улуус дьоҕурдаах уонна айар талааннаах оҕолорун өйүүр суолталаах түгэниэн буолла.
Үөрэх улуустааҕы салалтатын иһитиннэриитэ