Үөрэх тэрилтэлэрэ бэйэ-бэйэҕэ ыалдьыттаһан шефтэһиилэрэ — оскуола сайдарыгар уонна оҕолор инникилэригэр улахан кылаат.
Чурапчы Дириҥ агрооскуолата cаха норуодунай суруйааччыта, биллиилээх поэт, прозаик уонна тылбаасчыт Иван Егорович Федосеев – Доосо аатын сүгэр (дириэктэр Егор Владимирович Адамов). Бу агрооскуола — Саха сиригэр үлэнэн иитиини бастакынан олохтообут уонна саҥа таһымҥа таһаарбыт тирэх оскуолалартан биирдэстэрэ буолар.
Үөрэх кыһатыгар үлэ уонна үөрэх ситимэ оҕо кыра сааһыттан саҕалаан олоххо бэлэмнээх буолан тахсарыгар туһуланарын сэһэргииллэр. Оскуола үлэнэн иитиигэ «Сатабыл» технологиятын олоххо киллэрэн, оҕолору кыра саастарыттан илии үлэтигэр, айар-тутар сатабылга иитэллэр. Практическай агро-үөрэххэ оҕолор уруок таһынан бэйэлэрин базаларыгар бурдук, оҕуруот аһын уонна араас үүнээйини үүннэрэр куруһуоктарга, практикаларга сылдьаллар. Сыл аайы сайын оҕолорго анаан күнүскү уонна палаточнай үлэ лааҕырдара тэриллэллэр. Манна кинилэр айылҕаҕа сылдьан үлэлииргэ уонна бэйэ-бэйэни кытта хамаанда буолууга үөрэнэллэр. Идэни талыыга агрооскуола хайысхата оҕо инникитин тыа сиригэр хаалан, бэйэ хаһаайыстыбатын тэринэн эбэтэр агро-технология эйгэтигэр үлэһит буолан тахсарыгар олук уурар.
Биһиги, И.С.Портнягин аатынан Сыырдаах орто оскуолатын үлэһиттэрэ, бу ый 15 күнүгэр Дириҥ оскуолатын салалтатыныын эрдэттэн кэпсэтэн, сүбэлэһэн, ыалдьыт быһыытынан сылдьан оҕолор оҥорон таһаарбыт бородууксуйаларын, үлэлэрин сөҕө-махтайа көрдүбүт, иис-уус хайысхаҕа практическай дьарыктарын көрдүбүт. Онон, элбэх сыл устата тиһигин быспакка агро хайысханан үлэлээн кэлбит, билигин лаппа кыаҕын ылбыт оскуолаттан үлэ үөрүйэхтэрин билсиибит, биһиги оҕолорбут бэйэлэрин оскуолаларын базатыгар үлэҕэ уонна маастарыстыбаларын хаҥатыыга улахан тирэх буолуохтаах, инники үлэбитинэн оҕолорбутугар агро-идэлэри билиһиннэриигэ, практическай сатабылы сайыннарыыга уонна патриоттуу тыыҥҥа иитиигэ сүдү туһаны аҕалыа диэн эрэнэбит. Шефтэһии инники үлэбитигэр үтүө үлэ өрүттэрин саҕыа диэн эрэнэбит!
Ньургуяна Хорунова, иитэр үлэҕэ дириэктэри солбуйааччы