Быйыл Уус Алдан улууһун оскуолаларын выпускниктара Биир кэлим эксээмэҥҥэ 100 баалы ыллахтарына, кинилэргэ улуустан 100 000 солкуобай төлөнүөҕэ, 90-тан 99 баалга диэри туттарбыттар 50 000 солкуобайы ылыахтара.
Ону таһынан эксээмэни үрдүк баалга туттарбыт выпускнигы бэлэмнээбит учуутал эмиэ бириэмийэлэниэҕэ – үөрэнээччитэ 90-тан 100 баалга диэри туттарбыт буоллаҕына, учууталга 50 000 солкуобай төлөнүөҕэ. Бу төлөбүрдэри олохтуур туһунан улуус баһылыгын уурааҕа бүгүн таҕыста.
Санатар буоллахха, Уус Алдаҥҥа үөрэх эйгэтигэр 2024 сыл Үөрэх хаачыстыбатын үрдэтии сылынан биллэриллибитэ. Онуоха бу саҥа олохтоммут өйөбүл биллэриллибит сыл сыалын-соругун ситиһэргэ улахан көмө буолуоҕа.